ڕێباز حەملان: لیستی مووچەی مانگی چوار هیچ کێشەیەکی نییە و وردبینی بەردەوامە

ئاڤا نیوز

لیستی مووچەی مانگی چواری فەرمانبەرانی هەرێمی كوردستان ڕادەستی بەغدا كراوە و ئێستا لە وەزارەتی داراییە و وردبینی تێدا دەكرێت و هیچ كێشەیەكی نییە.

چیرۆکی سەرەکی: ماوەی سێ ڕۆژە شاندێکی تەکنیکی وەزارەتی دارایی کوردستان لە بەغدایە و لیستی مووچەی مانگی چواری ڕادەستی وەزارەتی دارایی عێراق کردووە، وردبینی لە لیستەکە بەردەوامە و چاوەڕوان دەکرێت لە چەند ڕۆژی داهاتوو بڕیار لەسەر ناردنی پارە بدرێت.

لێدوانی فەرمی: ڕێباز حەملان، بریكاری پێشووی وەزارەتی دارایی عێراق لە کۆنفڕانسێکی ڕۆژنامەوانی گوتی: تاكە گۆڕانكاریی لە لیستی مووچەی مانگی چوار بەراورد بە مانگی پێشوو كرابێت ناوی ئەو كەسانەیە كە وادەی خانەنشینیان هاتووە و خانەنشین كراون، ئەگینا هەمان لیستی مانگی سێیە، لە عێراق دابەشكردنی مووچە دەستی پێكردووە و لە هەرێمی كوردستانیش چاوەڕوانی تەواوبوونی وردبینیكردنی لیستەكە دەكرێت، كە وردبینی تەواو بوو مووچە ڕەوانە دەكرێت.

زانیاریی زیاتر: ئێستا شاندێكی تەكنیكیی وەزارەتی دارایی هەرێمی كوردستان لە بەغدان، ڕۆژانە سەردانی وەزارەتی دارایی عێراق دەكەن و لەگەڵ بەڕێوەبەرایەتیی ژمێریاری لەسەر هێڵن، ئەگەر وەزارەتی دارایی عێراق هەر تێبینییەكی لەسەر لیستی مووچە هەبێت ئەو تیمەی هەرێمی كوردستان ڕاستەوخۆ وەڵام دەدەنەوە و چارەسەری دەكەن.

لە لایەکی دیکەوە:  ئەمڕۆ پێنجشەممە ئاژانسی بەغداد ئەلیەوم لە هەواڵێكدا بڵاوی كردەوە كە ناوەڕاستی هەفتەی داهاتوو بەغدا بڕی 950 ملیار دینار بۆ مووچەی مانگی چوار بۆ هەرێمی كوردستان دەنێرێت.