گەنجێک بە تۆمەتی دزی لە سندووقی خێری مزگەوت دەستگیر دەکرێت

ئاڤا نیوز

 

بەتۆمەتی دزی لە سندووقی كۆكردنەوەی خێر بۆ مزگەوت لە سلێمانی و هەولێر، تۆمەتبارێک لەلایەن پۆلیسی سلێمانییەوە دەستگیر دەکرێت.

 

ڕاگەیێنراوی فەرمی: بەڕێوەبەرایەتیی پۆلیسی سلێمانی ڕایگەیاند: دوای ئەوەی لە شاری سلێمانی دزی لە سندووقی كۆكردنەوەی خێری دوو مزگەوت كرا، هێزەكانی پۆلیس لێكۆڵینەوە و بەدواداچوونەكانیان دەستپێكرد و چاودێری خرایە سەر مزگەوتەكان و توانرا لە كاتی دزیكردندا، تۆمەتبارەکە دەستگیر بكرێت. 

 

زانیاریی زیاتر: تۆمەتبارەکە لەدایکبووی ساڵی 2003ـە و بە بڕیاری دادوەر و بەپێی ماددەی 446 لە یاسای سزادانی عێراقی ڕاگیراوە، لە لێكۆڵنەوەكاندا دانی بەوەدا ناوە كە لە چەند مزگەوتێكی سلێمانی و هەولێر دزی لە سندووقی كۆكردنەوەی خێر كردووە.

 

ئەوەی پێویستە بیزانیت: چەند ڕۆژێک پێش ئێستا، پۆلیسی سلێمانی دوو کەسیان دەستگیر کرد کە ماتۆڕسكیل ‌و سندووقی‌ خێری‌ مزگه‌وتیان دزیوه‌.