شێخ دارا: ئەم شەپۆلی خۆڵبارینە هەڵگری ڤایرۆسە و مەترسی بۆ تەندروستی هەیە

ئاڤا نیوز

 

شێخی كەشناسی هۆشداری بە هاووڵاتیان دەدات، خۆیان لەو شەپۆڵی خۆڵبارینە بپارێزن كە لە ناوچەكانی ڕۆژئاوای عێراقەوە ڕووەو هەرێمی كوردستان هاتووە.

 

وێنە گەورەكە: لەژێر كاریگەری نزمەپاڵەپەستۆی دەریای سوور، شەپۆڵێكی خۆڵبارین عێراقی گرتووەتەوە كە لە بیابانەكانی سعوودیەوە سەرچاوەی گرتووە و كاریگەرییەكەی زیاتر لەسەر پارێزگاكانی ڕۆژئاوا و ناوەڕاستی عێراق دەركەوتووە، ئەمەش بەهۆی زیادبوونی خێرایی با، كەشناسیی عێراق پێشبینی دەكات سێ ڕۆژ بەردەوام بێت.

 

لێدوانی فەرمی: شێخ دارا، شارەزای كەشناسیی ئاڤا میدیا لە گەشتی هەواڵەكانی سەعات حەوت ڕایگەیاند، ئامۆژگاری هاووڵاتیان دەكەم، دەرگا و پەنجەرەی ماڵەكانیان داپۆشن، بەو پێیەی ئەو شەپۆڵی خۆڵبارینە 85% تاوەكو 90%ـی پڕە لە ڤایرۆس و هۆكارە بۆ نەخۆشكەوتن، بە تایبەت بۆ منداڵان مەترسییەكەی زیاترە.

 

ئەوەی پێشبینی دەكرێت: شێخ دارا ڕوونیشی كردەوە، لە سبەی هەینییەوە كاریگەری ئەو شەپۆڵی خۆڵبارینە لەسەر هەرێمی كوردستان بەرە بەرە كەمدەبێتەوە، بەڵام كاریگەرییەكەی بەسەر ناوچەكانی ناوەڕاست و ڕۆژئاوای عێراق هەر دەمێنێت.

- سبەی هەینی ئەگەری بارانبارین لاواز دەبێت بەڵام بە بارانبارینی ڕۆژی شەممە كاریگەری تۆز و خۆڵەكە بەیەكجاری نامێنێت، پلەكانی گەرماش دوو پلە دادەبەزن.