فایلی خەڵک؛ تەپوتۆزی ڕێگای نێوان دارەتووی کۆن و نوێ هاووڵاتییانی نیگەران کردووە

ئاڤا نیوز

بەهۆی وەستانی کارکردن لە ڕێگەی سەرەکی نێوان دارەتووی کۆن و نوێ لە هەولێر، دانیشتووانەکەی مەترسی نەخۆشی تەنگەنەفەسی و ڕەبویان لەسەرە.

چیرۆکی سەرەکی: ڕێگای سی مەتری نێوان دارەتووی کۆن و نوێ لەهەولێر چەند مانگێکە کارکردن تێیدا وەستاوە، بەهۆیەوە تۆز و خۆڵێکی زۆر دروست بووە، خەڵکی ناوچەکەش مەترسی نەخۆشکەوتنیان لەسەرە.

لێدوانی فەرمی: مەریوان حاکم هادی، بەڕێوەبەری گشتی شارەوانیەکانی هەولێر بە ئاڤای وت: لە مانگی یەکەوە بەهۆی نەبوونی پارەی نەختینەی، کارکردن لە ڕێگاکەدا وەستاوە. لە هەوڵی بەردەوامداین تا پارەکە دابین بکەین و دەست بەکارکردن بکەینەوە.

زانیاریی زیاتر: بە گوتەی بەڕێوەبەری گشتی شارەوانیەکانی هەولێر، سێ ڕێگا هەن کە کاریان تێدا وەستابوو و ئێستا قۆناغ بە قۆناغ دەست پێدەکەینەوە و ئەوانەی گلەییان لە شێوازی جێبەجێکردنەکە هەیە و ئاستی خانووەکانیان نزمترە ڕێگا چارەیان بۆ دەدۆزریتەوە بە زووترین کات.