وەزارەتی کارەبا بەرهەمهێنانی کارەبا زیاد دەکات

 

ئاڤا نیوز

وەزیری کارەبای حکومەتی هەرێمی کوردستان لەگەڵ خولیان گارسیا بەڕێوەبەری گرووپی کۆمپانیاکانی ئیمافیا و فارادای و ژووری بازرگانیی ئسپانیا- عێراقی تاوتوێی ڕەوشی کارەبا و زیادکردنی کارەبای کرد.

وێنە گەورەکە: وەزارەتی کارەبای حکومەتی هەرێمی کوردستان لەسەر ڕاسپاردەی سەرۆکوەزیران مەسرور بارزانی، بەردەوامە لە باشترکردنی ڕەوشی کارەبا و زیاد کردنی بەرهەمهێنانی کارەبا و دابینی بەشێوەی 24 کاتژمێری بۆ هاووڵاتییان.

ڕاگەیێنراوی فەرمی: وەزارەتی کارەبای حکومەتی هەرێمی کوردستان، ڕایگەیاند، لە میانەی کۆبوونەوەی وەزیری کارەبا لەگەڵ گرووپی کۆمپانیاکانی ئیسپانیا و ژووری بازرگانیی ئیسپانیا- عێراقی، جەخت لە ژێرخانی کارەبا کرایەوە کە 8000 مێگاواتە و ئێستا 4500 مێگاوات بەرهەم دەهێنرێت و لە پلان دایە بەرهەمهێنانی زیاتر بکرێت.

زانیاریی زیاتر: وەزیری کارەبا ئامادەیی وەزارەتەکەی بۆ پێشکەشکردنی هەموو کار ئاسانی و هاوکارییەک بۆ  وەبەرهێنان لە سێکتەرە جیاوازەکانی کارەبا دەربڕی.

ئەوەی پێویستە بیزانیت: شاندی گرووپی کۆمپانیاکانی ئیسپانیا و ژووری بازرگانیی ئیسپانیا - عێراقی، ئامادەیی کۆمپانیاکانی وڵاتەکەیان دەربڕی بۆ جێبەجێکردنی پڕۆژەی بەرهەمهێنانی کارەبا بە وزەی خۆر و با، هاوکات توێژینەوە و پێشکەشکردنی مینحە بۆ جێبەجێکردنی پرۆژەکانی کارەبا.