ڕاپەڕین وەک پرۆژەیەک بۆ داهاتوو

هەمیشە یادی ڕاپەڕینە مەزنەکەی خەڵکی کوردستان لە ئازاری 1991 دەکەینەوە وەک بۆنەیەک لە ڕابردوودا، وەک ئاکتێک کە ڕوویدابێت و کۆتایی هاتبێت، بەڵام بۆ نەوەی داهاتوو دەکرێت خوێندنەوەی دیکەو پێچەوانە بۆ ئەو ڕاپەڕینە مەزنەی میللەتەکەمان بکرێت و، جارێکی تر وەک شۆڕشێکی کۆتایی نەهاتوو سەیری ڕاپەڕین بکەین، وەک پرۆژەیەک بۆ داهاتوو، نەک وەک چیرۆکێک لە ڕابردوودا.

 

ڕاپەڕین لە ڕابردوودا ڕزگاربوون بوو لە دەستی ستەم و دیکتاتۆریەتی ڕژێمی بەعس کە هەر ئەو بەرخۆدانەی گەلی کوردستانیش بووە سەرەتا بۆ بەیەکجاری  کەوتن و کۆتاییهاتنی ئەو ڕژێمە و رزگاربوونی تەواوی پێکهاتەکانی عێراق لە دیکتاتۆریەت و کرانەوەی ئاسۆیەک بەرەو داهاتوو. 

واتە خەڵکی عێراقیش بەگشتی منەتباری ڕاپەڕین و ئازایەتی خەڵکی کوردستانن لە ئازاری 1991، گەرنا هەتا ئێستاش بەدەست دیکتاتۆریەتەوە دەیانناڵاند.

ڕاپەڕین وەک پرۆژەیەک بۆ داهاتوو بریتییە لە هێشتنەوە و بەرهەمهێنانی  ئەو خەون و خواست و خولیایانەی میلەتەکەمان لە ساتی ڕاپەڕیندا هەڵگری بوو، وەک ئازادی، حوکمی خۆبەخۆ، شکاندنی زیندانەکان، ئاوەدانکردنەوەی ناوچە قەدەغەکراوەکان (موحەرەمە). ڕاپەڕین پرۆژەی کارکردنە لەم ئامانجانەدا و بەدیهێنانیانە لە چوارچێوەی کۆمەڵێک دامودەزگای حوکمڕانی و کارگێڕی خۆماڵی خزمەتگوزار و سەرکەوتوو.

زۆرجار لە بۆنەی راپەڕیندا دەڵێین، "هێشتا ئامانجەکانی ڕاپەڕین بەتەواوی بەدی نەهاتوون" ئەم قسەیە ڕاستە، بەڵام ئایا ئامانجەکانی ڕاپەڕین بە چ مانایەک و ئایا ئەو ئامانجانە شایەنی بەدیهاتنن و کامانەن؟

ئامانجی ڕاپەڕین دەکرێت لە کۆمەڵێک ئامانجی گەورە و بچووکدا کۆبکرێنەوە، ئامانجی بچووک وەک ڕزگاربوون لەدەستی ڕژێمی پێشوو، وەک بەڕێوەبردنی شارەکانی کوردستان لەلایەن خودی ڕۆڵە و دانیشتووانی ڕەسەنی ئەو شارانەوە، هەروەها پێشکەشکردنی خزمەتگوزاری و دابینکردنی ژیانێکی شایستە بە گەلەکەمان کە ئەمانە کەم تا زۆر بەدیهاتوون.

 بەڵام هەموو ئەمانە  بەتەواوی نایەنە بوون و مسۆگەر نابن و مۆریان لێ نادرێ، ئەگەر لە ژێر یەک ئامانجی گەورەدا کۆنەکرێنەوە، ئەو ئامانجە گەورەیەش وەدیهاتنی دەوڵەتی گەورەی کوردستانە کە مافێکی ڕەوای خەڵکی کوردستانە بە نزیکەی 50 ملیۆن مرۆڤی دانیشتووی ئەم جوگرافیایەوە. 

ئەگەر ئەمە نەیەتەدی، ئەوا هەردەم ناوبەناو دەکەوینەوە ژێر فشاری دەوڵەتی سەنتەر وەک ئێستا لە بابەتی مووچە و شایستە داراییەکاندا دەیبینین.

لە یادی راپەڕیندا هەرگیز ناکرێت شارێکی ڕەسەن و کوردستانی وەک کەرکووک و ناوچە دابڕێنراوەکانمان لە یاد بچێت، ئەو کەرکووکەی هێشتاش هاوار دەکات "بە تەنیا جێم مەهێڵن"، بێگومان یەکێک لە ئامانجە گەورە بەدینەهاتوەکانی ڕاپەڕین  گەڕاندنەوەی ئەو شار و ناوچانەیە بۆ باوەشی نیشتمانی دایک.

بەدیهاتنی ئامانجەکانی ڕاپەڕین دەبێت لە خەون و ئەدەبیاتەوە ببێتە پرۆژەی سیاسی و کارگێڕی مۆدێرن و دیموکراسی، دەبێ نەوە دوای نەوە ئەم خەونە بکەنە پرۆژەی سیاسی و کار بۆ بەدیهاتنی بکەن تا گەیشتن بە ئامانجە مەزنەکە  کە سەربەخۆیی کوردستان و دەوڵەتی کوردستانە، وەک لە ڕیفراندۆمە مەزنەکەی 2017، خەڵکی کوردستان لە ڕێگەی سندووقەکانی دەنگدانەوە جەختیان لێ کردەوە و چەسپاندیان.

پرۆژەی "ڕاپەڕین لە داهاتوودا" ئەوەمان لێ دەخوازێت هەموو ئەو کەمووکوڕیانەی ئێستا لە هەرێمەکەماندا بوونیان هەیە چارەسەر بکرێن و خەونەکانمان لە چوارچێوەی دامودەزگای مۆدێرنی دیموکراسیدا بەدیبهێنین.

پێشمەرگە بکرێتە سوپایەکی نیشتیمانی، حکومەت بەهێز و سەرتاسەری بکرێت، پەرلەمان کارا و بە عەقڵانی بکرێت، دیموکراسی و ئازادی ڕادەربڕین و ئازادی میدیا و ڕۆژنامەگەری بەتەواوی لە چوارچێوەی یاسای مۆدێرن و دیموکراسیدا ڕێکبخرێن، ئۆپۆزیسیۆن بە نیشتیمانی بکرێت و هەمووان پابەندی چوارچێوە نیشتیمانییە باڵاکان ببن.