چەند بڕیارێکی نوێ لە بانکی ناوەندییەوە بۆ مووچەخۆرانی حکومی و کەرتی تایبەت

ئاڤا نیوز

چەند بڕیارێکی نوێ بۆ فەرمانبەران و مووچەخۆرانی حکومی و کەرتی تایبەت و خەڵک بەگشتی دەرکراون، بە تایبەت ئەوانەی مامەڵەیان لەگەڵ بانکدا هەیە.

ئەوەی پێویستە بیزانیت: بانکی ناوەندیی عێراق لەمەدوا تێچووی ڕاکێشانی پارە (عمولە) لە هەژماری بانکیی مووچەخۆرانی حکومیی و کەرتی تایبەت بەرزدەکاتەوە، لەمەودوا لە جیاتی دوو هەزار دینار، چوار هەزار دینار بۆ یەک ملیۆن وەردەگیرێت.

نووسراوی فەرمی: بانکی ناوەندیی عێراق نووسراوێکی ئاراستەی سەرجەم بانکە مۆڵەتپێدراوەکان کردووە کە ژمارەیان 58 بانکە، سێ بانکیان حکومین (ڕەشید و ڕافیدەین و تی بی ئای)، لەگەڵ 55 بانکی دیکەی ئەهلی، کە 24 یان بازرگانین و 31 بانکیشیان ئیسلامین، لەمەودوا تێچووی دروستکردنی کارتی بانکیی و نوێکردنەوەی کارت لەگەڵ ڕاکێشانی پارە لە هەژماری بانکیدا گۆڕانکاری بەسەردا دێت، گۆڕانکارییەکانیش بەم شێوەیە دەبن:

- ئەگەر فەرمانبەرێک یان کارمەندی کۆمپانیایەک بچێت لە بانک کارت دەربهێنێت، واتا ڤیزە کارت و ماستەر کارت، بەلایەنی زۆرەوە 15 هەزار دیناری لێ وەردەگیرێت. 

- بۆ نوێکردنەوەی کارتەکانیش، ئەگەر کەسێک کارتەکەی هەبوو و دوای دوو بۆ سێ ساڵ ئێکسپایەر بوو، نوێکردنەوەی بەهەمانشێوە بەلایەنی زۆرەوە 15 هەزار دینار وەردەگیرێت.

- گۆڕینی کارتی بانک (فەرمانبەری حکومیی و تایبەت) بەلایەنی زۆرەوە 25 هەزار دیناری لێوەردەگیرێت، ئەویش لە کاتێکدا ئەگەر کارتەکەی پێشترت ونکرد یان لێت شکابێت، ئەوا کارتێکی دیکەت بۆ دەردەهێنرێت بەو نرخە.

- عمولەی بانک بۆ بەڕێوەبردنی هەژماری بانکیی دوو هەزار دینار دەبێت، واتە ئەگەر مووچە لەڕێگەی بانکەوە بێت مانگانە دوو هەزارت لێ دەگێڕنەوە.

- ڕاکێشانی پارە بە ئامێری پۆس و ئەی تی ئێم بەگوێرەی ڕێژەی سەدی دەبێت؛ بۆ نموونە لە ملیۆنێک دینار  چوار بۆ شەش  هەزار دینار وەردەگیرێت، لە هەموو بارێکیشدا لە هەزار دینار کەمتر نابێت.

- بۆ حەواڵەی دەرەکیش بۆ هەر دۆلارێک 10 هەزار دینار وەردەگیرێت، بۆنموونە لەبەرامبەر ناردنی هەر 100 دۆلارێک بۆ دەرەوە هەزار دینارت لێ وەردەگیرێت، هەروەها بۆ دەفتەرێک دۆلار 100 هەزار دینار وەردەگیرێت.