ترەمپ یارمەتییەکانی ئەمریکا بۆ ڕووبەڕووبوونەوەی ئایدز و مەلاریا ڕادەگرێت

ئاڤا نیوز

 

بە بڕیارێک دۆناڵد ترەمپ، سەرۆکی ئەمریکا دابینکردنی دەرمانی پێویست بۆ نەخۆشییەکانی وەک ئایدز، مەلاریا و سیل ڕادەگرێت و ئیدارەکەی دەستیان بە ڕێکارەکان کردووە. بڕیارەکە هەموو ئەو هاوکارییانەش دەگرێتەوە کە ئەمریکا لە ڕێگەی پڕۆگرامی (USAID)ـیەوە لە سەر ئاستی جیهان پێشکەشی منداڵانی تازە لەدایکبووی دەکات.

 

زانیاریی زیاتر: بڕیارەکە گەیێنراوتە هەموو ئەوانەی کە لە ئاژانسی ئەمریکا بۆ گەشەپێدانی نێودەوڵەتی (USAID) کار دەکەن و داوایان لێکراوە دەستبەجێ دابینکردنی یارمەتییەکان بوەستێنن. هەروەها نزیکەی 60 بەرپرسی باڵای ڕێکخراوەکە بە شێوەی مۆڵەت ڕەوانەی ماڵ کراونەتەوە.

 

چی ڕوودەدات: ئەم هەنگاوەی ئیدارەکەی ترەمپ بەشێکە لە هەنگاوێکی فراوانتری ترەمپ بۆ ڕاگرتنی سەرجەم یارمەتییە دەرەکییەکان بۆ ماوەی 90 ڕۆژ لە ڕۆژی دەستبەکاربوونیەوە.

 

بۆچوونی لایەنی بەرامبەر: ئاتول گاواندی، بەرپرسی پێشووی USAID ڕایگەیاند، بەهۆی یارمەتییەکانی ئەمریکا بۆ دابینکردنی دەرمان، نزیکەی 20 ملیۆن کەس کە هەڵگری ئایدزن دەیانتوانی بژین، ئێستا دابینکردنی ئەو دەرمانانە ڕاگیراوە و ئەوەش کارەساتە. یارمەتییەکان دەدرایە 6.5 ملیۆن منداڵی بێدایکوباوک و تووشبووی ئایدزی لە 23 وڵات.

 
ئەمەش بزانە: ساڵی 2023، ئەمریکا بە تەنیا 72 ملیار دۆلار یارمەتی بۆ ڕزگارکردنی ژیانی خەڵک پێشکەش کردووە. ساڵی دواتریش 42٪ـی کۆی ئەو یارمەتییانەی کە هەموو نەتەوە یەکگرتووەکان پێشکەشی کردووە هی ئەمریکا بووە.