یەکەم لێدوانی ئەمریکا لەبارەی کۆبوونەوەی سەرۆک بارزانی و مەزڵووم عەبدی

ئاڤا نیوز

 

سەرۆک مەسعود بارزانی و مەزڵووم عەبدی، فەماندەی گشتیی هەسەدە کۆبوونەوە و ئەمریکا لەبارەی دیدارەکەوە پەیامێک بڵاوکردەوە و باس لەوە دەکات: دیالۆگ و گفتۆگۆی نێوان کورد ڕۆڵێکی  گرنگ دەگێڕێت.

 

چیڕۆکی سەرەکی: ڕۆژی 16-1-2025، لە پیرمام کۆبوونەوەیەکی گرنگ و مێژوویی لەبارەی ئایندەی کورد لە سووریا و ناوچەکە بەڕێوەچوو، سەرۆک بارزانی لەگەڵ مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) کۆبووەوە و دوایین بارودۆخی سووریا و ئایندەی کوردیان لەو وڵاتە تاوتوێ کرد.

 

ڕاگەیێنراوی فەرمی: نووسینگەی کاروباری ڕۆژهەڵاتی ناوەڕاست لە وەزارەتی دەرەوەی ئەمریکا ڕایگەیاند، ئەمریکا پێشوازی لە کۆبوونەوەی ڕۆژی 16ـی 1ـی 2025ـی نێوان سەرۆک مەسعود بارزانی، سەرۆکی پارتی دیموکراتی کوردستان و جەنەڕاڵ مەزڵووم عەبدی، فەرماندەی هێزەکانی سوریای دیموکراتی کرد.

 

-هاوکات لە درێژەیی پەیامەکەدا هاتووە، دیالۆگ و گفتۆگۆی نێوان کورد ڕۆڵێکی  گرنگ دەگێڕێت، بەتایبەت لە پتەوکردنی گواستنەوەی سیاسی گشتگیر لە سووریا.

 

بۆچی گرنگە: دوای گۆڕانکارییەکانی سووریا و کەوتنی بەشارد ئەسەد، سەرۆک بارزانی چەندین هەوڵ و دەستپێشخەری بۆ نزیکبوونەوەی نێوان لایەنە کوردییەکانی سووریا هەبووە، بە تایبەت بۆ نزیکبوونەوەی هەسەدە و ئەنەکەسە.

 

ئەوەی لەبارەیەوە دەگوترێت: کۆبوونەوەکە بە دەستکەوتێکی گرنگ و بەرچاو دادەنرێت بۆ بەهێزکردنی یەکڕیزی کورد و پێگەی کورد لە سووریای نوێ و ناوچەکە.