وەزیری دەرەوەی سووریا سەردانی چەند وڵاتێک دەکات

ئاڤا نیوز

 

ئەسعەد ئەلشەیبانی، وەزیری دەرەوەی سووریا، لە چەند ڕۆژی داهاتوودا چەند سەردانێکی فەرمی بۆ دەرەوەی وڵات دەکات.

 

وێنە گەورەکە: دوای کەوتنی دەسەڵاتی بەشار ئەسەد لە سووریا لە 8-12-2024، هێزەکانی تەحریرولشام دەسەڵاتی وڵاتەکەیان گرتەدەست دەسەڵاتێکی نوێی لە سووریا دامەزراند، وڵاتەکەش هەوڵەکانی خستووەتە گەڕ بۆ نوێیکردنەوەی پەیوەندییەکانی لەگەڵ وڵاتانی ناوچەکە و دەرەوە.  

 

زانیاریی زیاتر: بڕیارە ئەلشەیبانی سەردانی هەر یەکە لە قەتەر، ئیمارات و ئوردن بکات، ئەمەش دوای ئەوەی کە لە ڕۆژانی ڕابردوودا وەک یەکەمین سەردانی دەرکی سەردانی سعودییە کردبوو.

 

ئەوەی پێویستە بیزانیت: حکومەتی سووریا دەیەوێت لە بونیاتنانەوەی ژێرخانی سووریادا و بەهێزکردنی ئابوورییەکەیدا، یارمەتی و پاڵپشتیی وڵاتانی دەوڵەمەندی کەنداو بەدەست بهێنێت کە زیاتر لە دەیەیەک شەڕی ناوخۆ و سزا نێودەوڵەتییەکان زیانی زۆریان بە سووریا گەیاندووە.

 

بە تەنیشت ئەم بابەتەوە: ڕۆژی دووی ئەم مانگە، حکومەتی کاتی سووریا یەکەم سەردانی شاندی دیبلۆماسی خۆی دەستپێکرد، شاندێکی باڵای وڵاتەکە گەیشتنە ڕیازی پایتەختی وڵاتی سعودییە و باسیان لە پەیوەندییەکانی نێوان یان کردووە.