دۆناڵد ترەمپ بۆ ئێران: ئەمریکا هێڵی سوور بۆ ئێران دادەنێت

ئاڤا نیوز

 

دۆناڵد ترەمپ لە ڕێگەی نێردەکەیەوە پەیامێک ئاڕاستەی ئێران دەکات و ڕایدەگەیەنێت لە کۆبوونەوەکەی ئەمڕۆ دەبێت هێڵی سوری ئەمریکا بە ئێران ڕابگەیەنرێت.

 

وێنە گەورەکە: گفتووگۆ و دانووستانەکان لە نێوان ئێران و ئەمریکا دوای چەندین هەڕەشە و لێدوانی تووندی دژ بە یەک ئەنجامەکەی بە ڕێککەوتن لەسەر کۆبوونەوەیەکی ناڕاستەوخۆ لە مەسقەتی پایتەختی سەڵتەنەی عومان کۆتایی هات، پێش کۆبوونەوەکە دۆناڵد ترەمپ لە ڕێگەی ستیڤ ویتکۆڤی، نێردەیەوە بۆ کاروباری ڕۆژهەڵاتی ناوڕاست پەیامێکی بۆ ئێران هەیە و هێڵی سوور بۆ تاران دادەنێت.

 

لێدوانی فەرمی: ستیڤ ویتکۆڤ، نێردەی تایبەتی سەرۆکی ئەمریکا بۆ کاروباری ڕۆژهەڵاتی ناوڕاست ڕایگەیاند، دۆناڵد ترەمپ سەرۆکی ئەمریکا داوای لێکردوون پەیامێکی تایبەت بە وەفدی ئێران ڕابگەیەنن و بڵێن " هێڵی سوری ئەمریکا بۆ ئێران بوون بە خاوەنی چەكی ئەتۆمیە"، ئەمریکا بە هیچ شێوەیەک ڕێگە نادات تاران ببێت بە خاوەنی چەکی ئەتۆمی و هەموو ڕێگەیەک بۆ ئەو مەبەستە دەگرێتە بەر.

 

زانیاریی زیاتر: لە ئێستادا وەفدی ئێران بە سەرۆکایەتی عەباس عێراقچی، وەزیری دەرەوەی ئێران و وەفدی ئەمریکا بە سەرۆکایەتی ستیڤ ویتکۆڤ، نێردەی تایبەتی سەرۆکی ئەمریکا لە مەسقەتی پایتەختی سەڵتەنەی عومان ئامادەن بۆ ئەنجامدانی کۆبوونەوە و دانووستان و هەموو جیهان چاوەڕوانی ئەنجامی کۆبوونەوەکە دەکەن.