سەرۆکایەتیی سووریا: بەشار ئەسەد دیمەشقی جێنەهێشتووە

ئاڤا نیوز

 

دوای پەرەسەندنە خێراکەی سووریا و پێشڕەویی گرووپە چەکدارەکانی ئۆپۆزیسیۆنی ئەو وڵاتە و نزیک بوونەوەی لە شاری حومس و دیمەشقی پایتەخت، دەنگۆی هەڵاتنی ئەسەد بڵاوبووەتەوە، بەڵام سەرۆکایەتیی کۆماری سووریا دووپاتی دەکاتەوە کە بەشار ئەسەد هێشتا لە دیمەشقە و وڵاتی جێنەهێشتووە.

 

وێنە گەورەکە: دوای ئەوەی ئۆپۆزیسیۆنی سووریا لە ماوەیەکی کەمدا توانیی ژمارەیەکی زۆر شار و ناوچە گرنگەکانی سووریا لەژێر دەستی سووپا بێنێتە دەر و کۆنترۆڵی بکات، باس لە هەڵاتنی سەرۆککۆماری وڵات و خێزانەکەی دەکرێت، ئەمەش حکومەتی سووریای ناچار کرد بێتە دەنگ و ڕەتی بکاتەوە.

 

راگەیێنراوی فەرمی: سەرۆکایەتیی کۆماری سووریا لە بەیاننامەیەکدا ڕایگەیاند: میدیا بیانییەکان پرۆپاگەندە و هەواڵی ناڕاست دەربارەی دەرچوونی سەرۆک بەشار ئەسەد لە وڵات بڵاودەکەنەوە، ئەو ئێستا لە دیمەشقە و کاروباری وڵات و ئەرکە نیشتیمانی و دەستوورییەکەی بەڕێوەدەبات. 

 

ئەوەی پێویستە بیزانیت: گرووپە چەکدارەکانی ئۆپۆزیسیۆنی سووریا 20 کیلۆمەتر لە دیمەشقی پایتەختی سووریا دوورن و پێشبینی دەکرێت لە چەند کاتژمێری داهاتوو دا کۆنترۆڵی پایتەخت بکات. هاوکات لەگەڵ ئەوەش ئەو گرووپانە چەندین شار و ناوچەی دیکەیان کۆنترۆڵ کردووە.