شاندێک بۆ پرسی مووچە دەچێتە بەغدا

ئاڤا نیوز

شاندێکی وەزارەتی دارایی و ئابووری هەرێمی کوردستان، بەمەبەستی چارەسەرکردنی کێشەی مووچە بەرەو بەغدا بەڕێكەوت.

وێنە گەورەکە: ئەمڕۆ سێشەممە  وەزارەتی دارایی عێراق بڕی 550 ملیار دیناری بۆ مووچەی فەرمانبەرانی بۆ مانگی هەشتی هەرێمی کوردستان خەرج کرد، ئەو شاندە دەیەوێت بزانێت بۆچی مووچەی مانگی حەوت نەنێردراوە.

زانیاریی بەدەستهاتوو: سەرچاوەیەک لە وەزارەتی دارایی و ئابووری حکومەتی هەرێمی کوردستان بە ئاڤا نیوزی گوت: "شاندەکە لە بەغدا لەگەڵ وەزیری دەرەوە، وەزیری دارایی و بەڕێوەبەری ژمێرکاری وەزارەت و دیوانی چاودێری دارایی عێراق، لەسەر هۆکاری ناردنی مووچەی مانگی هەشت لەبری مانگی حەوت گفتوگۆ چارەسەری یەکجاری پرسی مووچە دەکەن."

ئەوەی پێویستە بیزانیت: زیاتر لە 50 ڕۆژە هیچ مووچەخۆرێکی هەرێمی کوردستان بە سەربازی و مەدەنییەوە مووچەی وەرنەگرتووە، وەزارەتی دارایی عێراق بەهۆکاری بوونی تێبینی لە لیستی ناوی فەرمانبەران، مووچەی مانگی تەمموزی ڕەوانەی هەرێمی کوردستان نەکردووە.