ڕووسیا دەیەوێت سەرۆكوەزیرێك و چەند بەرپرسێكی ئەوروپا دەستگیر بكات

ئاڤا نیوز

ڕووسیا سەرۆكوەزیرانی ئیستۆنیا و چەند بەرپرسێكی تری ئەوروپای خستە لیستی داواكراوەكانەوە، بە تۆمەتی ئەوەی گوایە لە وێرانكردنی مۆنیومێنتی یادكردنەوەی جەنگی سەردەمی سۆڤێتدا دەستیان هەبووە.

چیرۆكی سەرەكی: دەمێكە لە ئیستۆنیا و لاتڤیا و لیتوانیا مشتومڕ لەسەر هێشتنەوە و لابردنی مۆنومێنتی یادكردنەوەی سوپای سووری سۆڤێت هەیە، كە لەو وڵاتانەدان، هەر سێ وڵاتەكەش لە دوای جەنگی ئۆكرایناوە كەوتنە لابردنی ئەو مۆنیومێنتانە.

ئەوەی ئێستا ڕوودەدات: لە بەرامبەردا ڕووسیا چەند بەرپرسێكی ئەو سێ وڵاتەی خستە نێو لیستی داواكراوەكانەوە، لەوانە: كایا كالاس، سەرۆكوەزیرانی ئیستۆنیا؛ تەیمار پیتەركۆب، وەزیری دەوڵەتی ئیستۆنیا؛ كارۆل ناڤرۆكی، سەرۆكی پەیمانگای یادی نیشتمانیی پۆڵاند؛ سیمۆناس كایریس، وەزیری ڕۆشنبیریی لیتوانیا.

لێدوانی فەرمی: ماریا زاخارۆڤا، گوتەبێژی وەزارەتی دەرەوەی ڕوسیا ڕایگەیاند "چەند كەسێكی دیكەمان بۆ نێو لیستی داواكراوەكانمان زیاد كردووە كە لە وێرانكردنی مۆنیومێنتی سەربازە سۆڤێتییەكان بەرپرسیارن. دەبێت تاوان لە دژی یادی ڕزگاركەرانی جیهان لە نازیزم و فاشیزم سزای هەبێت، ئەمەش تەنها سەرەتایە".

دمیتری پێسكۆڤ، گوتەبێژی كرێملین گوتی "ئەوانەی خراونەتە لیستەكەوە كاری دوژمنكارانەیان بەرامبەر یادی مێژوویی ڕووسیا كردووە".

باكگراوند: سوپای سوور سوپای یەكێتیی سۆڤێت بوو، لە جەنگی جیهانیی دووەمدا دژ بە هیتلەر و هاوپەیمانەكانی جەنگان. یەكێتیی سۆڤێت لە ساڵی 1991 ەوە نەماوە.