سەرۆک بە تەنیا هاتە ژوورێ !

لە دنیایەکی پڕ ململانێ و ڕاکەڕاک و ژاوەژاودا، دنیایەک کە بارکراوە بە وشە و دەربڕینی دڕ و دەنگی ناساز، چەند دیمەنێک بە بێدەنگی و بە ڕیتمێکی هێمن و ئارام سەرنجی قووڵمان بەلای خۆیاندا ڕادەکێشن و دەمانپەڕێننەوە تا سەر سنوورەکانی تێڕامانێکی ڕۆحیی دڵنیایی بەخش..

دیمەنی یەکەم: 

لەناکاو، بێ پێشەکی و شڵەژان، سەرۆک مەسعود بارزانی، بێ پاسەوانی تایبەت، بێ سکرتێر و یاوەر و  بێ لەشکرێک لە ئاسایش و زێرەڤانی، بە تەنیا بەسەر فەرشی سووردا بە هەنگاوی پتەو و زەمینگر و ئارام، ڕووی لە هۆڵی مەراسیمی ڕۆژی نزای نیشتمانیی کوردستان کرد !

بەلای منەوە وەک پسپۆرێکی میدیا و کۆمیونیکەیشن، ئەم دیمەنە بەشێکی سەرەکی بوو لە گوتارێکی نەگوتراو و گۆنەکراو، کە بارگاوی بوو بەم ئاماژە قووڵانە:

1. ڕەمزییەت (سیمبۆلیزم)ی خۆنەویستی و خاکەڕایی:

ڕەفتارێکی وەها لەلایەن سەرۆک و ڕابەرێکی ناودار و هەزار و یەک حیساب بۆکراوەوە، ڕەنگدانەوەی خۆنەویستییەکی ڕۆحییە، پێمان دەڵێت: من پێش ئەوەی سەرۆک بم مرۆڤێکم وەک ئێوە، بەندەیەکی ئەو خودایەم کە خودای هەمووانە. لە کولتوور و بەهای کوردەواریشدا، وەک زۆربەی کولتوورەکانی تری ڕۆژهەڵات، ئەم جۆرە خۆنەویستی و سادەیی و خاکەڕاییە هەڵگری پەیامێکی ناڕاستەوخۆی زۆر کاریگەرە و دەنگدانەوەیەکی زۆر ئەرێنی هەیە و لەلایەن میللەتەوە ڕێزلێگیراوە.

2. هێزی ناخ و متمانە بەخۆبوون:

چوونەژوورەوە بەبێ یاوەر و پاسەوان و خزمەتگوزار، پەیامێکی ناڕاستەوخۆیە کە ئەو نە لە مرۆڤەکان و نە لە هەڕەشەکان دەترسێت، چونکە ئارامی و دڵنییایەکی ڕۆحیی لە ناخیدا سەریهەڵداوە و متمانەیەکی نەبڕاوەی بە پێگەی جەماوەریی خۆی هەیە. ڕەفتارێکی لەم جۆرە پێمان دەڵێت سەرکردایەتی پشت بە شەرعیەتی ڕۆحی و جەماوەری دەبەستێت نەک تەنها بە هێز و دەسەڵاتی ماددی.

3. هەنگاوێک بۆ پاکژبوونەوەیەکی ڕۆحی:

لە بۆنەیەکی ئایینی وەک ڕۆژی نیشتیمانی نزادا، بەتەنیایی دەرکەوتنی سەرۆک، دەربڕینی خواستێکی قووڵە بۆ ئەوەی وەک مرۆڤێک خۆی دابماڵێت لە هەموو نازناو و ڕواڵەتە دوونیاییەکان و بچێتە حاڵەتی ڕێزگرتن و ملکەچبوونێکی ڕۆحیی تەواو لەبەردەم خودای خۆیدا. تەنیاییەک کە پێمان دەڵێت: "ئێمە ئەمڕۆ بۆ نزا کۆبووینەتەوە.. هەمووشمان لەبەردەم خودادا یەکسانین".

4- پەیامێکی سیاسی ناڕاستەوخۆ:

بەدیوێکی تردا دەشێت ئەو بە تەنیایی هاتنە هەنگاوێکی ژیرانە و حیساب بۆکراو بێت بۆ گەیاندنی پەیامێکی سیاسی کە هەموو کاتێک سەرکردە پێویستی بە پاراستن و پاسەوان نییە، چونکە موڵکی خەڵکە و بۆ خەڵکە و لەناو خەڵکدایە، هاوکات دەیەوێت پەیامی سەقامگیری و متمانە بە ئاسایشی ناوخۆش بگەیەنێت.

5. ئیلهامبەخشی جەماوەری:

لە کولتووری باوی کوردەواریدا کە لەناو گوتاری سیاسی و کۆمەڵایەتیدا بەهاو گرنگییەکی زۆر بە هێما دەدات، دیمەنی سەرکردە و ڕابەرێک کە بە تەنیا و بە هێمنی بێ پاسەوان و بێ پرۆتۆکۆڵ دەچێتە ناو هۆڵی نزای نیشتمانییەوە، دیمەنێکی ئیلهامبەخشە بۆ هەموو ئەوانەی بە مەرجەعی خۆیانی دادەنێن، پێگەی ڕەمزیی ئەو سەرکردەیە وەک "باوک" و "دەوڵەتمەدارێکی نموونەیی" بەرزتر ڕادەگرێت.

دەرکەوتنی کتوپڕی بێ پاسەوان و بێ یاوەری سەرۆک بارزانی، تەنیا دیمەنی یەکەم بوو کە پڕ لە واتای ڕەمزی و بڕێک ئاماژەی قووڵی مرۆیی و مەعنەوی هەڵگرتبوو. 

دیمەنی دووەم:

سەرۆک بارزانی لەناکاو لە ناوەندی ڕاڕەوەکەدا ئیستێکی کرد و بۆ ساتێک بەلای چەپدا بە شکۆوە ڕووی کردە وێنەیەکی هەڵواسراوی ڕەشوسپیی جوانەمەرگ ئیدریس بارزانیی برا گەورەی. ئەو دیمەنەش دەرگایەکی تری فراوانی بەڕووی تێڕامانێکی قووڵدا کردەوە:

1. ئیستێک بۆ برایەتییەکی تاهەتایی:

ئەم وەستانە لەناکاوە لەبەردەم وێنەی جوانەمەرگ ئیدریس بارزانیدا ڕەفتار و کردەوەیەکی ئاسایی نەبوو. بەڵکو چڕکراوەی ئازار و خەمێکی قووڵی لەدەستدانی برا و هاوڕێ و دۆست و هاوسەنگەری ساڵانێکی سەختی خەباتی خوێناوی بوو. بەرجەستەبوونی پەیوەندییەکی ڕۆحی ئەوتۆ بوو کە مردن نەیتوانیبوو کۆتایی پێبهێنێ. سەرۆک لەو  ئاوڕدانەوە و ئیستە ساتەوەختەیدا، تەنها وێنەیەکی نەدەبینی، بەڵکو ڕۆحێکی هاوبەش و مێژوویەکی نەبڕاوەی تاهەتایی دەهاتنەوە پێش چاوی. سەرۆک بەو وەستان و تێڕامانەی، هەبوونی کاکە ئیدریسی لەناوماندا دووپات کردەوە، نەک بە جەستە، بەڵکو بە سەنگ و هەناسە و هەڵوێست و ڕۆحی نەمری لەناو دڵی مێژوودا.

 

2. بەردەوامبوون لە خەبات تا سەربەخۆیی:

سەرۆک بارزانی بە تێڕامانی لە وێنەی برا جوانەمەرگەکەی، وا دیاردەکەوت بەدەم ڕێوە بەخێرایی و بەقووڵی پێداچوونەوە بۆ ساڵانی ژیانی هاوبەشیان بکات و لە ناخەوە سوێندی بۆ بخوات کە درێژە بە کاروانی خەبات بدات تا سەربەخۆیی. ئەم دیمەنانە ڕەمزییەت بۆ سەرکردەکان دروست دەکەن و نیشانی دەدەن کە ئەو بەهایانەی باوەڕیان پێیان هەیە هێشتا لەناخیاندا زیندوون.