پووتین: وڵاتانی ڕۆژئاوا هەرگیز ناتوانن شکستمان پێ بهێنن لە ئۆکراینا

ئاڤا دیجیتاڵ

ڤلادمیر پووتین، سەرۆکی ڕووسیا لە چاوپێکەوتنێکدا ڕایگەیاند وڵاتانی ڕۆژئاوا ناتوانن شکست بە وڵاتەکەی لە ئۆکراینا بهێنن و تا کۆتایی دەجەنگن بۆ بەرژەوەندییەکانیان.

بۆچی گرنگە: سەرۆکی ڕووسیا یەکەمجارە چاوپێکەوتن لەگەڵ ڕۆژنامەنووسێکی ئەمریکی دەکات لەدوای دوو ساڵ و ئەم چاوپێکەوتنە دەنگدانەوەیەکی گەورەی بەدوای خۆیدا هێنا لەنێو ئەمریکا و جیهان. 

تەكەر كارڵسن چاوپێکەوتنەکەی لەگەڵ پووتین ئەنجامدا کە یەكێكە لە بەناوبانگترین رۆژنامەوانەكانی ئەمریكا و جیهان، لە فۆكس نیوزی ئەمریكی لەبەر ئەوەی رەخنەی لە وڵاتەكەی گرتبوو لەسەر پاڵپشتیكردنی لە ئۆكراینا دژی رووسیا دەركرا، ڕەخنەكەشی ئەوەبوو چەندین ملیار دۆلار لەسەر حسابی گەلی ئەمریكا دراوە بە ئۆكراینا.  

ئەوەی پێویستە بیزانیت: لە چاوپێکەوتنەکەیدا لەگەڵ تەکەر کارلسن، سەرۆکی ڕووسیا لەسەر چەندین بابەت قسەی کرد و یەکێک لەوانە جەنگی نێوان ڕووسیا-ئۆکراینا بوو کە ماوەی دوو ساڵە بەردەوامە.

لێدوانی فەرمی: ڕووسیا هەتا کۆتایی لەپێناو بەرژەوەندییەکانیدا دەجەنگێت و سەرکردەکانی ڕۆژئاوا ناتوانن هەرگیز شکست بە ڕووسیا بهێنن لە ئۆکراینا، ئەمە گوتەی ڤلادمیر پووتین بوو لە چاوپێکەوتنەکەدا.

لەکاتی پرسیارکردن لەوەی ئاخۆ نیازی ئەوەی هەیە هێرش بکاتە سەر وڵاتانی دیکەی ئەوروپا وەک پۆڵەندا، ڤلادمییر پووتین ڕایگەیاند، "تەنها لە یەک حاڵەتدا کە ئەگەر یەکەمجار هێرش بکرێتەسەرمان چونکە ئێمە هیچ بەرژەوەندییەکامان لە پۆڵەندا یان لاتیڤیا و هیچ شوێنێکی دیکە نییە."

هەنگاوی داهاتوو: ماوەی چاوپێکەوتنەکە دوو کاتژمێری خایاند و پووتین باسی لە ئەگەری ئاگربەست و ئاشتی کرد لە ئۆکراینا بە مەرجی ئەوەی ئەمریکا چیدیکە چەک بۆ ئۆکراینا نەنێرێت. 

"ئەگەر بەڕاستی دەتانەوێت شەڕ بوەستێت، ئەوا پێویستە چەک نەنێرن بۆ ئۆکراینا و شەڕ لە چەند هەفتەیەکدا دەوەستێت"، پووتین وای گوت

ئەمەش بزانە: لەوکاتەوەی شەڕ لە شوباتی 2022 دەستیپێکردووە، واشنتن بە بەهای زیاتر لە 110 ملیار دۆلار هاوکاری ئۆکراینای کردووە و جەختی لەوە کردووەتەوە کە هەرگیز بە مەرجەکانی پووتین رازی نابێت بۆ ڕاوەستانی جەنگ.