ئاستی ئاڵوگۆڕی بازرگانی نێوان هەرێمی کوردستان و ئێران چەندە؟

ئاڤا نیوز

 

هه‌رێمى كوردستان و ئێران له‌سه‌ر‌ بنه‌ماى دراوسێيه‌تيى باش و به‌رژه‌وه‌نديى هاوبه‌ش و به‌رزكردنه‌وه‌ى قەبارەی ئاڵوگۆڕى بازرگانى و په‌يوه‌نديى ئابووری، بره‌ویان به‌ په‌يوه‌ندييه‌كانى نێوانیان داوە.

 

وێنە گەورەکە: لە چوار ساڵی ڕابردوو، قەبارەی ئاڵوگۆڕی بازرگانیی نێوان هەرێمی کوردستان و کۆماری ئیسلامی ئێران بۆ سەرووی شەش ملیار دۆلار بەرز بووەتەوە.

 

زانیاریی زیاتر: هەرێمی کوردستان و عێراق بە گشتی لە دوای چین پلەی دووەمی گرتووە لە هاوردەکردنی کاڵای ئێرانی، بەرپرسانی ئەو وڵاتە ئاماژە بۆ ئەوە دەکەن "عێراق بەردەوام هاوبەشی بازرگانی یەکەم یان دووەمی ئێران بووە، هاوکات لە ڕیزی پێنج هاوبەشە بازرگانییە سەرەکییەکەی ئێراندایە".

 

لێدوانی فەرمی: پێشتر مستەفا شێخ عەبدولڕەحمان، سەرۆکی یەکێتیی هاوردە و ناردنکارانی هەرێمی کوردستان بە ئاڤا نیوزی گوتبوو: "لە ماوەی چوار ساڵی ڕابردوو، قەبارەی ئاڵوگۆڕی بازرگانی لە چوار  ملیار دۆلارەوە بۆ شەش ملیار بەرز بووەتەوە، زۆرینەی کاڵاکان خواردەمەنی، جلوبەرگ، کەرستەی بیناسازی و ئامێری کارەبایین كە لە ئێرانەوە هاوردەی هەرێمی کوردستان دەکرێن".