لیژنەی دارایی تاوەکو ئێستا ڕاپۆرتی خشتەکانی بودجەی تەواو نەکردووە

ئاڤا نیوز

 

بڕیارە سبەی پەرلەمانی عێراق بۆ دەنگدان بە خشتەکانی بودجە کۆببێتەوە، بەڵام تاوەکو ئێستا لیژنەی دارایی ڕاپۆرتی خۆی لەبارەی خشتەکانی بودجەی تەواو نەکردووە، ئەندامێکی لیژنەکەش ئاماژە بۆ ئەوە دەکات هیچ گرفتێک بۆ پشکی کوردستان لە خشتەی بودجە نەهاتووەتە پێشەوە.

 

وێنە گەورەکە: بڕیاربوو یەکشەممە 2-6-2024 لیژنەی دارایی پەرلەمانی عێراق کۆبوونەوەکانی خۆی لەسەر خشتەکانی بودجەی ئەمساڵ کۆتایی پێبێنێت و سبەی دووشەممە لە کۆبوونەوەی پەرلەمان کە بڕیارە کاتژمێر سێی دوای نیوەڕۆ کۆببێتەوە، دەنگ لەسەر پەسندکردنی بدات.

 

لێدوانی فەرمی: د.خەلیل غازی دۆسکی، ئەندامی لیژنەی دارایی لە پەرلەمانی عێراق بە ئاڤا نیوزی ڕاگەیاند: ناکۆکی لەنێوان لایەنە سیاسییەکان هەیە لەسەر خشتەی بودجە، هەندێک لایەن دەیانەوێت دەستکاری بکەن و هەندێکیش دەیانەوێت وەک خۆی پەسند بکرێت، ئەمشەو کۆبوونەوەیەک دەکرێت، بەیانیش کۆبوونەوەیەک دەکرێت و دەگەینە ڕێککەوتنێک پشتیوان بە خودا.

 

زانیاریی زیاتر: بە گوتەی د.خەلیل دۆسکی، "هیچ گرفتێک بۆ پشکی کوردستان لە خشتەی بودجە نەهاتووەتە پێشەوە" و بە دووریشی زانی کۆبوونەوەی پەرلەمان دوابخرێت، هۆکارەکەشی بۆ ئەوە گەڕاندەوە "ڕاپۆرتەکە هەمووی لە چوارچێوەی یەک لاپەڕەدا نووسراوەتەوە، ئەگەری بەڕێوەچوونی دانیشتنە زۆر زیاترە لە بەڕێوەنەچوونی".

 

ئەمەش بزانە: بودجەی گشتیی ئەمساڵی عێراق 211 تریلیۆن دینارە و بڕی 66.6 تریلیۆن دینار کورتهێنانی هەیە.