کاردانەوەی وڵاتانی جیهان لەبارەی گیانلەدەستدانی سەرۆککۆماری ئێران

ئاڤا نیوز

 

ڕووداوی گیان لەدەستدانی سەرۆککۆماری ئێران و وەزیری دەرەوە و ژمارەیەک بەرپرسی دیکەی ئەو وڵاتە کاردانەوەی فراوانی بەدوای خۆیدا هێنا، جگە لە پرسە و سەرەخۆشی بەشێک لە وڵاتان ماتەمینیشیان ڕاگەیاند.

 

چیرۆکی سەرەکی: ئێوارەی ڕۆژی یەکشەممە 19-05-2024 هێلیکۆپتەری ئیبراهیم ڕەئیسی، لە خاڵێکی سنووریی تەورێز بەهۆی "خراپیی کەشوهەوا" ونبوو و دوای 18 کاتژمێر لە گەڕان، هێلیکۆپتەرەکە بە تێكشکاوی دۆزرایەوە و سەرۆککۆمار و یاوەرەکانیشی گیانیان لەدەست دا.

 

هاوخەمییەکان بۆ ئێران:

سەرۆک بارزانی: بە بیستنی هەواڵی گیانلەدەستدانی ئیبراهیم ڕەئیسی و وەزیری دەرەوەی ئێران لە ڕووداوی دڵتەزێنی کەوتنەخوارەوەی هێلیکۆپتەر زۆر خەمگین بووم.

 

نێچیرڤان بارزانی، سەرۆکی هەرێمی کوردستان: لەم کاتە سه‌خت و دژواره‌دا له‌ دڵه‌وه‌ هاوخه‌مى و هاوسۆزيى قووڵمان له‌گه‌ڵ ڕابه‌رى كۆمارى ئيسلامى عه‌لى خامنه‌يى و سه‌ركردايه‌تى و حكومه‌ت و گه‌لى ئێرانى دۆست و دراوسێ و خانه‌واده‌کانیان ده‌رده‌بڕین.

 

سەرۆکوەزیران بارزانی: پرسە و سەرەخۆشی و هاوخەمی قووڵی خۆمان ئاراستەی ڕێبەرایەتی و حکومەت و خەڵکی کۆماری ئیسلامیی ئێران دەکەین.

 

محەممەد شیاع سوودانی، سەرۆکوەزیرانی عێراق: سەرەخۆشی و هاوخەمی ئاراستەی عەلی خامنەیی ڕێبەری کۆماری ئیسلامی و حکومەت و گەلی ئێران دەکەین.

ڕەجەب تەیب ئەردۆغان، سەرۆککۆماری تورکیا: لەم کاتە سەخت و خەمناکەدا لە تەنیشت ئێران دەوەستین.

محەممەد بن زاید ئال نەهیان سەرۆکی ئیمارات: جەخت لە هاوسۆزی خۆمان لەگەڵ ئێران دەکەینەوە لەم دۆخە سەختەدا.

تەمیم بن حەمەد، میری قەتەر: لە دڵەوە سەرەخۆشی ئاراستەی حکومەت و گەلی کۆماری ئیسلامی ئێران دەکەین.

عەبدولفەتاح سیسی، سەرۆکی میسر: لەم کارەساتە گەورەیەدا هاوسۆزی وڵاتەکەمان لەگەڵ سەرکردایەتی و گەلی ئێران دەردەبڕین.

بەشار ئەسەد، سەرۆک سووریا: سەرەخۆشی لە ڕێبەری ئێران و گەلەکەی دەکەین.

شا عەبدوڵڵای دووەم، شای ئوردن: سەرەخۆشی قووڵ ئاراستەی کۆماری ئیسلامی ئێران، ڕێبەرایەتی و حکومەت و گەلەکەی دەکەین.

مەحموود عەباس، سەرۆکی فەڵەستین: پرسە و سەرەخۆشی ئاراستەی گەلی ئێران دەکەین.

ڤلادیمێر پوتن، سەرۆکی ڕووسیا: هاوخەمیی خۆم بۆ کۆچی دوایی سەرۆککۆماری ئێران دەردەبڕم.

شەهباز شەریف، سەرۆکوەزیرانی پاکستان: ئێمە سەرەخۆشی و هاوخەمی قووڵی خۆمان بۆ ئێران دەردەبڕین.

یەكێتیی ئەوروپا: سەرەخۆشی لە كۆماری ئیسلامیی ئێران دەکەین بەهۆی گیانلەدەستدانی سەرۆككۆمار و وەزیری دەرەوە و هاوڕێكانی. 

شی جی پینگ، سەرۆکی چین: سەرەخۆشی ئاراستەی ئێران دەکات.

 

ماتەمینییەکان

ئێران: پێنج ڕۆژ ماتەمینی سەرتاسەری ڕاگەیاند
عێراق: ڕۆژێک ماتەمینی سەرتاسەری ڕاگەیاند
سووریا: سێ ڕۆژ ماتەمینی سەرتاسەری ڕاگەیاند
لوبنان: سێ ڕۆژ ماتەمینی سەرتاسەری ڕاگەیاند
پاکستان: ڕۆژێک ماتەمینی سەرتاسەری ڕاگەیاند