زیاتر لە 15 هەزار هاونیشتمانیی هەرێمی کوردستان بەبێ مۆڵەت حەج دەکەن

ئاڤا نیوز 

 

لە هەرێمی کوردستان تەنیا چوار هەزار و 685 کەس مافی بەشدارییان لە حەجی ئەمساڵدا هەیە، بەڵام زیاتر لە 15 هەزار کەس بە ڤیزەی یەکساڵی و بەبێ مۆڵەت چوونەتە سعودیە و حەج دەکەن.

 

لێدوانی فەرمی: سەید عەبدوڵا محەممەد، خاوەنی یەکێک لە کۆمپانیاکانی بواری حەج و عەمرەیە بە ئاڤا نیوزی ڕاگەیاند: بە تەنیا لە ڕێگەی کۆمپانیاکەی خۆیەوە نزیکەی 8 هەزار ڤیزە وەرگیراوە، کە لە نێویاندا ڤیزەی یەکساڵی هەیە.

 

لەلایەکی دیکەوە: شێخ نیاز نەقشبەندی، بەڕێوەبەری گشتیی حەج و عومرەی هەرێمی کوردستان دەڵێت "بە هیچ جۆرێک ناتوانین بەرپرسیارێتی ئەو حاجیانە لەئەستۆ بگرین کە ڤیزەکەیان هی حەج نییە".

 

زانیاریی زیاتر: د. عومەر مرۆ، ئەندامی لیژنەی باڵای فەتوای هەرێمی کوردستان دەڵێت: ناتوانین بە حەجی ئەو کەسانە بڵێین حەرامە، بەڵکو تەنیا ناڕێکی و ناپەسەندی لە ڕێکارەکانیان هەیە.

 

کاریگەری و لێکەوتەکان: بە پێی ڕێکارەکانی حکومەتی سعودیە لە دوای 18-05-2024 ڕێگە بە هەڵگرانی ڤیزەکانی جیاواز لە حەج نادرێت، هەرکەسێک لە دوای ڕێکەوتی 02-06- 2024 لەناو خاکی سعودیە بگیرێت و ڤیزەی حەجی نەبێت، سزای تووند چاوەڕێی دەکات کە بریتییە لە:

•  
• ـ پێبژاردن بە 10 هەزار ڕیاڵی سعودی کە دەکاتە نزیکەی 3 هەزار دۆلاری ئەمریکی
• 
  ـ بەندکردن بۆ ماوەیەک کە کەمتر نەبێت لە 6 مانگ
• 
  ـ ڕێگەنەدان بە چوونە ناو خاکی سعودییە بۆ ماوەیەک کەمتر نەبێت لە 10 ساڵ
•  

ئەوەی پێویستە بیزانیت: ئەم زانیارییانە و وردەکاریی زیاتر لەناو بەرنامەیەکی کاروان ڕەحمان باس کراوە کە کاتژمێر 09:00ـی شەوی پێنجشەممە ڕێککەوتی 16-05-2024 لە ئاڤا نیوز بڵاو دەکرێتەوە.