لە شرناخ بەرهەمهێنانی نەوت ڕۆژانە 40 هەزار بەرمیلی تێپەڕاند

ئاڤا نیوز

 

لە کێڵگە نەوتییەکانی گابار لە شرناخی باکووری کوردستان، ڕۆژانە 40 هەزار بەرمیل نەوت بەرهەم دەهێنرێت و تاوەکو کۆتایی ئەمساڵ بۆ 100 هەزار بەرمیل بەرزدەبێتەوە.

 

وێنە گەورەکە: دوای ئەوە دەسەڵاتدارانی تورکیا لە بانگەشەی هەڵبژاردنەکاندا بەڵێنیان دابوو "خاکی شرناخ  بگۆڕن بۆ شاری نەوت"، بۆ بەجێهێنانی بەڵێنەکەیان هەوڵ دەدەن ئاستی بەرهێنانی نەوت تاوەکو کۆتایی ئەمساڵ بۆ 100 هەزار بەرمیل لە ڕۆژێکدا بەرز بکەنەوە.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا لە شرناخ گوتی: شرناخ ساڵانێکە بەهۆی تیرۆرەوە هەمیشە لە دواوە ماوەتەوە، "شرناخ  ئیدی خاکی نەوتە نەک تیرۆر".

 

ئەوەی پێویستە بیزانیت: بەگوێرەی زانیارییەکانی وەزارەتی وزەی تورکیا، لەکێڵگە نەوتییەکانی گابار ڕۆژانە 40 هەزار بەرمیل نەوت بەرهەم دێت، ژمارەی بیرەکانی کێڵگەی بەرهەمهێنانی نەوتی شەهید ئەیبوکە یاڵچن تاوەکو کۆتایی ئەمساڵ بۆ 95 بیر زیاد دەکات و ئاستی بەرهەمهێنان بۆ 100 هەزار بەرمیل نەوت لە ڕۆژێکدا بەرزدەبێتەوە.

 

ئەمەش بزانە: بە زیادبوونی بەرهەمهێنانی نەوت ئابووری شارەکە گەشە دەکات و هەلی کار بۆ زیاتر لە سێ هەزار کەس دابین دەکرێت.