سێ ساڵە عێراق پێویستیی بە گەنمی دەرەوە نەماوە

ئاڤا نیوز

حکومەتی عێراق پێشبینیی دەکات، ئەمساڵیش وەک پار و پێرار، ئەوەندە گەنمی جوتیارانی ناوخۆ بکڕێتەوە کە پێویستیی بە هاوردەکردنی گەنمی وڵاتان نەبێت.

لێدوانی فەرمی: حەیدەر نووری گەڕاوی،  بەڕێوەبەری بۆردی دانەوێڵەی عێراق، بە ئاژانسی بلومبێرگی گوتووە لەم هەفتەیەوە وەرزی دروێنەی گەنم دەستپێدەکات و چاوەڕێ دەکرێت لانیکەم 4.5 ملیۆن تۆن گەنم بەرهەم بهێنرێت و لە ئەنبارەکانیش بڕی 2.8 ملیۆن تۆن گەنم هەیە، ئەوەش بەشی پڕۆگرامەکانی دابینکاریی حکومەت بۆ ساڵ و نیوێک دەکات، بۆیە عێراق ئەمساڵیش پێویستیی بە هاوردەکردنی گەنم نییە.

ئەوەی پێویستە بیزانیت: حکومەتی عێراق ساڵانە بڕی 4.7 ملیۆن تۆن گەنم بۆ بەکاربردنی ناوخۆیی دابەش دەکات و ئەم بڕە گەنمەش لە جوتیاران دەکڕێتەوە. حکومەت گەنم بە دوو هێندەی ئەو نرخەی لە بازاڕەکانی جیهان هەیە لە جوتیارانی ناوخۆ دەکڕێتەوە تا لەم ڕێگەیەوە هانی بەرهەمهێنانی ناوخۆیی بدات.

زانیاریی زیاتر: حکومەتی عێراقی تۆنێک گەنمی بەراوی پشتبەستوو بە ئاودێریی مۆدێرن بە 850 هەزار دۆلار و گەنمی دیکەش بە 800 هەزار دینار دەکڕێت. ئەمە لە کاتێکدایە ئەگەر ئەم گەنمە لە ڕووسیا بکڕێت بۆ تەنێک کەمتر لە 400 هەزار دینار دەدات.

ئەمەش بزانە: لەگەڵ ئەوەدا کە حکومەتی عێراق بۆ پڕۆگرامی بەشەخۆراک پێویستیی بە گەنمی دەرەوە نییە، بەڵام هێشتا لە وەرزی ساڵی 2024-2025ـدا بازرگانانی عێراق بڕی 2.3 ملیۆن تۆن گەنمیان هاوردە کردووە و هێشتاش عێراق وەک وڵات یەکێکە لە گەورەترین کڕیارانی گەنم.