بەغدا 950 ملیار دینار بۆ مووچەی مانگی یەک دەنێرێت

ئاڤا نیوز

 

پێشبینی دەکرێت لە چەند کاتژمێری داهاتوو بەغدا بڕیاری خەرجکردنی مووچەی مانگی یەک بدات و 950 ملیار دینار بە دوو گوژمە بۆ هەرێمی کوردستان بنێرێت. 

 

زانیاریی تایبەت: ئاڤا زانیوویەتی لە چەند کاتژمێری داهاتوو وەزارەتی دارایی عێراق بڕیاری خەرجکردنی مووچەی مانگی یەکی فەرمانبەرانی هەرێمی کوردستان دەدات کە 950 ملیار دینارە و بە دوو گوژمە ڕەوانە دەکرێت. هاوکات چاوەڕوان دەکرێت لە ناوەڕاست تاوەکو کۆتایی هەفتە پارەکە بگاتە هەرێمی کوردستان.

 

زانیاریی زیاتر: دوای ئەوە بەپێی ڕێکارەکان، نووسراو ئاڕاستەی بانکی ناوەندیی عێراق دەکرێت بۆ ئەوەی پارەکە بخاتە سەر هەژمارەکەیان لە لقی هەولێر و بدرێتە هەرێمی کوردستان، بەڵام ئاڤا لە بانکی ناوەندیی عێراقەوە زانیاریی دەستکەوتووە، کە هێشتا بڕیارەکەیان بە دەست نەگەیشتووە بۆ ئەوەی ئەمڕۆ مووچەی مانگی یەک خەرج بکرێت.

 

ئەوەی پێشبینی دەکرێت: ئاڤا زانیاریی لە وەزارەتی دارایی کوردستان دەستکەوتووە، ئەگەر شاندی هەرێمی کوردستان و وەزارەتی دارایی عێراق لەسەر لەسەر لیستی مووچەی مانگی یەک ڕێک بکەون، ئەوا لیستی مووچەی مانگی یەک دەکرێتە بنەما بۆ هەموو مانگەکانی ئەمساڵ.

 

ڕێککەوتنەکە بەمشێوەیە: دەربارەی مووچەی خانەنشینکراوانیش سەرچاوەکەی وەزارەتی دارایی ڕایگەیاند، ئەو فەرمانەبەرانەی تەمەنیان گەیشتووەتە تەمەنی خانەنشینی، واتە تەمەنەکانی 60 تاوەکو 63 ساڵ ناویان لە لیستی مووچە دەرهێنراوە، ئەو فەرمانبەرانە تاوەکو مامەڵەی خانەنشینبوونیان تەواودەکەن مووچە وەرناگرن، بەڵام هەر کاتێک مامەڵەکەیان تەواو بوو لە مانگی یەکی ئەمساڵەوە بۆیان ئەژماردەکرێت و هەموو مووچەکانیان پێکەوە وەردەگرن.

 

باکگراوند: ماوەی سێ ڕۆژە شاندی هەرێمی کوردستان بۆ مووچە و بودجەی خەڵکی کوردستان لە بەغدان و لەگەڵ شاندی وەزارەتی دارایی عێراق کۆبوونەوەکان بەردەوامن و بە گوتەی هەردوولا کۆبوونەوەکان ئەرێنی بوون.