خەزێنەی ئەمریکا ژمارەیەک بانک و کەسایەتیی عێراق و کوردستان سزادەدات

 

ئاڤا نیوز

خەزێنەی ئەمریکا بەنیازە سزای نوێ و تووند بەسەر کۆمەڵێک بانکی عێراق و ژمارەیەک بەرپرس و کەسایەتیدا بسەپێنێت و پارەکەیان بلۆک بکات، ئاڤا زانیویەتی دوو بانکی کوردستان و چەند بەرپرسێکی کوردیشی تێدایە.

چیرۆکی سەرەکی: بەمەبەستی دوورکەوتنەوە لە پاڵپشتیکردنی تیرۆر و پارەدارکردنی، سپیکردنەوەی پارە و ناردنی پارە بۆ ئەسزاو وڵاتانەی سزای ئەمریکایان لەسەرە، خەزێنەی ئەمریکا لیستێکی گشتگیری ئامادەکردووە بۆ ئەوەی سزا بەسەر ژمارەیەک بانکی عێراقی کە دوو بانکی کوردستان و چەند بەرپرسێکی کوردیشی تێدایە بسەپێنێت، دیارترین بانکەکان بریتین لە بانکی ڕافیدەین، بانکی ڕەشید و بانکی تی بی ئای.

زانیاری بەدەستهاتوو: بە گوێرەی بەدواداچوونەکانی ئاڤا، لە کوردستانی سزا بەسەر دوو بانک دەسەپێنرێت و ناوەکانیان لای ئاڤا پارێزراوە، لەگەڵ ژمارەیەک بەرپرسی کورد، بەڵام ئاڤا نەیتوانی پشتڕاستی بکاتەوە بەرپرسەکان کێن.

زانیاریی زیاتر: ئێستا ڕەشنووسی سزاکان ئامادەکراوە، هەندێ پێشنیازی تریش هەن بۆ فراوانکردنیان، ناوی بانک و کەسایەتییەکان دەخرێتە بەر دەستی دۆناڵد ترەمپ بۆ ئەوەی واژۆی لەسەر بکات. وەک ئاڤا زانیویەتی لە ماوەی کەمتر لە دوو مانگدا سزاکان ڕادەگەیێنرێن.

لەلایەکی دیکەوە: پێشتر عەلی عەلاق, پارێزگاری بانکی ناوەندیی عێراق لە سەردانێکدا بۆ ئەمریکا، گەرەنتی ئەوەی دابوو کە ئیدی سەرپێچی ناکەن!

بۆچوونی لایەنی بەرامبەر: ئەمریکا دەڵێت دەست ناپارێزن لە هەر کەس و لایەنێک بیەوێ سەرپێچی لە ڕێنماییەکان بکات، لە ئەمریکا یاسایەک هەیە، ئەویش ئەوەیە کە مادام کار بە دۆلار دەکەیت، دەبێت پابەندی یاساکانیش بیت، بەشێک لەم کەس و بانکانەی ناویان لە لیستی سزاکەدا هاتووە، تێوەگلاون لە شووشتنەوەی پارە، ناردنی پارە بۆ ولاتان بەتایبەت ئێران و لوبنان و سەنگافورە. تەنانەت دەستیان هەبووە لە پێدانی پارە بەو گرووپانەی ئەمریکا بە تیرۆریست دایان دەنێت.

لەگەڵ ڕاگەیاندنی بڕیارەکە ئەم بانک و بەرپرس و کەسایەتییانە ناتوانن بەهیچ شێوەیەک دۆلار بەکاربهێن، ناتوانن مامەڵەی دەرەکی بکەن، هەروەها ئەو پارە و سەرمایەیەی کە لەڕێگەی نایاساییەوە دەستیان کەوتووە و بردوویانەتە دەرەوەی وڵات، بلۆک دەکرێت و دەستی بەسەردا دەگیرێت.

ئاڤا زانیویەتی ژمارەیەک بەرپرس و کەسایەتی عێراق کە کوردیشیان تێدایە، پارەیان ناردووەتەوە سەنگافوورە و لە بانکەکانی ئەو وڵاتە هەڵیانگرتووە، ئەگەر سزاکانی ئەمریکاش دەربکرێن پارەکەیان لەوێ بلۆک دەکرێت کە ملیاران دۆلار دەبێت. بەشێك لە کەسایەتی و سەرکردەی عێڕاقیش دەخرێنە لیستی تیرۆرەوە! ماوەیەک پێش ئێستاش پارەی ژمارەیەک بەرپرسی عێراقی لە لوبنان بلۆک کرا.

ئەوەی پێشبینی دەکرێت: کاریگەری خراپی لەسەر ئابووریی عێراق دەبێت، بەدڵنیاییەوە کاریگەری لەسەر دۆلاریش دەبێت و پێشبینی بەرزبوونەوەی بەهای دۆلار دەکرێت،  بەتایبەت کە زۆربەی پارەی عێراق لە بانکەکانی رەشید و رافیدەینە.

بە تەنیشت ئەم بابەتەوە: بانکەکانی رەشید و ڕافیدەین حکومین، حکومەتی عێراق زۆر داوا دەکات مووچەی مووچەخۆرانی کوردستان تەوتین بکەن و پلانیشیان داناوە لە ئایندەیەکی نزیک لق لە شارەکانی کوردستان بکەنەوە، هەر دوێنێ و ئەمڕۆش لە کۆبوونەوەکانی شاندی کوردستان لەگەڵ عێراق جارێکی دیکە جەختی لەسەر کرایەوە. ئەم سزایانە هەر خۆی وەڵامێکە بەوەی کە سیستەمی دارایی و بانکی عێراق متمانەی لەسەر ناکرێ!