لە هەولێر فەرمانبەران ‌‌هێشتا زەوییەکانیان تاپۆ نەکراوە کڕین و فرۆشتن پێوە دەکەن

ئاڤا نیوز

بەشێک لە فەرمانبەرانی سنووری هەولێر کە سوودمەند بوونە لە وەرگرتنی زەوی، پێش ئەوەی زەوییەکانیان تاپۆ بکرێت، کڕین و فرۆشتنی پێوە دەکەن.

چیرۆکی سەرەکی: چەند مانگێکە لەبەشێکی شار و شارۆچکەکانی هەرێمی کوردستان پرۆسەی دابەشكردنی زەوی دەستیپێکردووە و لە هەولێر هێشتا تاپۆیان نەکردووە کەچی کڕین و فرۆشتنیان پێوە دەکرێت، شارەوانیش دەلێت نایاساییە ناتوانن یەک بلۆک ببەنە سەر زەوییەکانیان.

لێدوانی فەرمی: کارزان عەبدولهادی، سەرۆکی شارەوانی هەولێر بە ئاڤا میدیای گوت، "تاوەکو ژمارەی تۆمار وەرنەگرن، هیچ فەرمانبەرێک بەڕەسمی نابێتە خاوەنی ئەو زەوییەی بۆی دەرچووە، ناتوانرێت هیچ مامەڵەیەکی پێوە بکرێت و دەستکاری بکەن".

زانیاریی زیاتر: بەشێکی ئەو فەرمانبەرانەی لە سنووری هەولێر زەوییان بۆ دەردەچێت لە  گوندی ئاشۆکان زەوییان پێدەدرێت، هەندێکیان کڕین و فرۆشتن بە زەوییەکان دەکەن هێشتا ژمارەی زەوییەکانیشان له شارەوانی وەرنەگرتووە.