وەزارەتی پەروەردە: داوامان کردووە ئەو مامۆستایانەی خانەنشین دەکرێن لە دەوامکردن بەردەوام بن

ئاڤا نیوز

وەزارەتی پەروەردە، داوای لە ئەنجوومەنی وەزیران کردووە، ئەو مامۆستایانەی خانەنشین دەکرێن لەسەر دەوامکردن بەردەوامبن تاوەکو مانگی شەش و چاوەڕێی وەڵامن.

چیرۆکی سەرەکی: بەگوێرەی بڕیارێکی حکومەتی هەرێمی کوردستان ژمارەیەکی زۆری فەرمانبەر خانەنشین دەبن و بەشێوەیەکی کتوپڕ ئەرکەکانیان جێدەهێڵن، بەگوێرەی ڕێنمایی وەزارەتی دارایی لە 01-01-2025ـەوە وەک خانەنشین هەژمار دەکرێن.

لێدوانی فەرمی: سامان سیوەیلی، وتەبێژی وەزارەتی پەروەردەی حکومەتی هەرێمی کوردستان لەبارەی پڕکردنەوەی شوێنی ئەو مامۆستایانەی کە خانەنشین دەکرێن دەڵێت، ئەوان داوایان لە ئەنجوومەنی وەزیران کردووە، ئەو مامۆستایانەی خانەنشین دەکرێن لەسەر دەوامکردن بەردەوامبن تاوەکو مانگی شەش، بەڵام تاوەکو ئێستا دیار نییە داواکارییەکەیان جێبەجێ دەکرێت یاخود نا، ئەوان چاوەڕێی وەڵامی ئەنجوومەنی وەزیرانن.

لەلایەکی دیکەوە: وتەبێژی وەزارەتی پەروەردە لەبارەی بەشێک لە قوتابخانەکانی سنووری دهۆک کە کابینەن، دەڵێت، کابینەی نۆیەم بەردەوامە لەسەر نۆژەنکردنەوە و دروستکردنی قوتابخانەکان و ئەولەویەتیش بۆ ئەوەیە دەوام کردن لەو کابینانەدا نەمێنێت، نەناردنی بودجەش لە لایەن حکومەتی عێراق بووەتە هۆکار بۆ ئەوەی ئەم پرۆسەیە وەک پێویست بەڕێوەنەچێت.