سەروک بارزانی؛ ئێکرێزیا هێز و دیپلۆماسیا کوردان

 

سەردەمێ نها سەردەمێ دیپلوماسیەت، گرنگیدان ب پرسێن هەڤبەش و راگرتنا بالانسا هێزێیە نە خاسمە د روژهەلاتا ناڤەراست کو ب چەقێ گرژی و ئالوزیێن ئاینی، نەتەوەیی و ئایدلوژی دهێتە هەژمارکرن. لەوما گرنگیدان ب پرسێن نیشتیمانی و حەژێکرن و پاراستنا بنەمایێن کوردینیێ د هەماندەمدا خوگونجاندن دگەل گورانکاریێن قادا نیڤدەوولەتی و جیهانگیریا بەردەوام ئێکە ژ فاکتەرێن سەرەکیێن مانا مە وەکە قەوارەیەکێ سەربەخوو و بریاردەر ل دەڤەرێ. کارکرنەکا بەردەوام و بێ راوەستان و کیشانا ماف و پرسێن گرێدایی ب مافێن گەلێ کورد ل سەر نەخشەدانانا دیپلوماسی و کارکرنا دناڤبەرا ئاکتەرێن جیهانی ئەو پرسێن نەگورن کو رێزدار جەنابێ سەروک مەسعود بارزانی هەردەم کریە ئەولەویەتا کارێن خو و ب جدی کار لسەر هندێ کریە کو پرسا کوردی جهێ خو د دیالوگا ناوچێ و جیهانی بگریت و هەرێما کوردستانێ ب تایبەتی د سێکتەرێ پاراستنا ئەولەهیێ فاکتەرەکێ گرنگێ هاوکێشەیێن سیاسی و سەربازی بیت و د هەماندەمدا مالەکا مەزن ب هەمبێزەکا گەرم بو ئاوارە و قوربانیێن شەر و ئالوزیان بیت.

 

د جیهانا نها و دەڤەرەکا مینا روژهەلاتا ناڤەراست کو ب ململانێ و نائارامیەکا بەردەوام دهێتە نیاسین، هندەک سەرکردە وەکو هێمایا نەگوریا هیڤیان و ئێکگرتنێ راوەستیاینە. سەروک مەسعود بارزانی ئەو سەرکردەیێ کاریزمایە کو سنورێن نەتەوەیی و جیاوازیێن ئایدلووژی دەربازکرینە بو وێ ئێکێ کو کوردان د هەوڵا دادپەروەری و ئێمناهی و ئازادیێدا بکەتە ئێک دەنگ و ئێک بریار.

دیدارا دناڤبەرا سەروک مەسعود بارزانی و مەزلوم عەبدی فەرماندەیێ هێزێن هەسەدێ ل روژئاڤایێ کوردستانێ روویدانەکا گرنگا مونومێنتالی یا هەی نەک ب تنێ بو کوردان بەلکو بو ئاسایێشا سوریێ و هەمی دەڤەرێ ب گشتی چونکە نها کورد یاریزانەکێ گرنگێ گورەپانا سیاسیە ل روژهەلاتا ناڤەراستدا ب تایبەتی ل سوریایێ. د سەردەمەکێدا کو زور جاران ئێکرێزیا کوردان ژ لایێ هێزێن بیانی و ناڤخوویی ڤە بەرەروی هندەک تەحەددیاتێن مەزن بوویە، لێ ئەڤ کوبوونەوەیا دوهی هەلگرێ پەیامەکا بهێزە کو یەکرێزیا کوردان مومکینە و سەروک مەسعود بارزانی ئەو چەترا رەمزیە کو هەمی لایەنێن کوردی بێ جوداهی لژێر سیبەرا ڤێ چەترێ ئێکگرتی و گەشێ بکەن.

 

لوکالی: چریسکا هیڤیان بو کوردێن روژئاڤا

 

بو کوردان ل روژئاڤایێ کوردستانێ ئەڤ چەند سالێن دەربازبوویی سالێن پری ململانێ و مان و نەمانێ بوویە. شەرێ ناڤخوویێ سوریا و دەستێوەردانا بیانی و هەبوونا ڕژێمەکا دڕندە ل دیمەشقێ چ هیڤیێن ژیانێ بو کوردان نەهێلابوون. سەرەرای ڤێ چەندێ کوردێن روژئاڤا شیان هێزەکا سەرنجراکێش بخو دروستبکەن نەخاسمە د بەرەنگاربوونەوەیا هێزێن داعشێ و رێکخراوێن دیێن تیروریستی ل سوریایێ. لێ پشتی نەمانا بەشار ئەسەد لسەر دەسهەلاتێ و هاتنە سەرکارا تەحریر ئەلشام و هەولا سەر ژ نوی ئاڤەدانکرن و دانانا سیستەمێ نویێ سوریایێ تەحەددیاتێن بەروکا کوردان زێدەتر کرن و و هەبوونا سەرکردەیەکێ کو هەمی کوردێن روژئاڤا بێ جوداهی و ئارماجەکا نەتەوەیی و دیموکراسی رێکبێخیت زێدەتر کر. لەورا دیدارا سەروک بارزانی و مەزلوم عەبدی هیڤیەکا زور دناڤا کوردێن روژئاڤادا بەلاڤکریە و بوویە بناغەیا ئامادەکاریەکا ریشالی دناڤبەرا هەمی هێزێن جودایێن روژئاڤایێ کوردستانێ. ئەڤ چەندا هەنێ ڤەدگەریتەڤە بو لێهاتووییا دیپلووماسی یا جەنابێ سەروک بارزانی کو دشێت هاریکارەکێ مەزن بیت د بهێزکرنا پێگەهێ کوردان د دانوستاندنێن ل دیمەشقێ و ئاکتەرێن دیێن د گورەپانا سیاسیا سوریادا.

 

ناوچەیی: پەیامی سەقامگیری و ئاشتەوایی

 

ل دەڤەرەکا مینا روژهەلاتا ناڤەراست کو تێدا ڕکابەری و گومان ببیتە نورم، سەروک بارزانی شیایە وەکو هێز و سەرکردەیەکێ سەقامگیرکەر سەرەدەریێ بکەت. پابەندبوون ب دیالووگ و ئاشتەوایێ بوویە ئەگەرێ هندێ کو جەنابێ وان ببیتە هەڤبەشەکێ گرنگ د بریاردانێ نەک بتنێ دناڤا کورداندا بەلکو د روژهەلاتا ناڤەراستێ ب گشتی. د دوسەیا سوریایێ سەروک بارزانی داکوکیکەرێ مافێ کوردان بوویە بو هندێ کو کورد ب دەنگەکێ ئێکگرتی دگەل دیمەشقێ دیالوگێ بکەن و هەروەسا هەمی هەولەکێ ددەت کو دەستێوەردانێن سەربازی ل روژئاڤایێ کوردستانێ نەمینن و نەبنە ئەگەرێ دروستکرنا نائارامیێ بو دەڤەرێن کوردی و تێکدانا ئاسایێشا وان و پاراستنا سەرومالێن سڤیلان بێ جوداهیا نەتەوەیی و ئایینی ل روژئاڤا. ئەڤ چەندا هەنێ نمونەیەکا رونا کاریگەرێن پەیوەندیێن جەنابێ سەروک بارزانینە کو سەرەرای گڕژێن مێژوویی جەنابێ سەروکی شیایە هەولا پەیدا کرنا تشێن هەڤبەش دناڤبەرا کوردان و وەلاتێن جیراندا پەیدا بکەت داکو ببیتە ئەگەرێ کێمکرنا ئالنگاریان نە خاسمە د دەمێن هوسا هەستیاردا. دیپلوماسیا جەنابێ وان وەکو پرەکێ دناڤبەرا گروپێن جودایێن کوردی و نەتەوەیێن دیێن دناڤا سوریادا دشێت ببیتە زەمینەسازەک بو سەقامگیریەکا درێژخایەن کو تێدا دیالوگ و ئێکدوقەبولکرن ئێدی ژ خەونان ببیتە راستیەکا ژ هەژی بو تەڤایا سوریایێ ب گشتی و روژئاڤایێ کوردستانێ ب تایبەتی.

 

جیهانی: چارەسەرکەرەکێ دیپلوماسی بو کێشەیان

 

سەروک مەسعود بارزانی لسەر شانویا جیهانی ژ مێژە دەنگەکێ باوەرپێکری بوویە ب تایبەتی بو ئاشتی و ئارامیێ و پاراستنا مافێن کوردان ل هەر چوار پارچەیێن کوردستانێ. سەرکردایەتیا جەنابێ وان ئەو بیرئینانەوەیە کو کورد بتنێ پرسەکا لوکالی یان ناوچەیی نینە بەلکو خەمەکا جیهانیە. لەورا دیدارا سەروک بارزانی و مەزلوم عەبدی تەکەزیێ دکەتە سەر ڕولێ سەروک بارزانی کو هەردەم د رەوشێن تەنگاڤدا وەکە ئەکتەرەکێ دیپلوماسی د قادا نیڤدەوولەتیدا هەردەم هەولێ ببدەت کو ماف و گرنگیدان ب پرسا ئاسایێشا کوردان ببیتە ئەولەویەتا کارکرنێ. شیانێن سەروک بارزانی بو هەڤسەنگکرنا بەرژەوەندیێن نیڤدەوولەتی و تموحا کوردان گەلەکا ناوازەیە. نمونەیا هەولا ئێکرێزیکرنا دەنگێن جودایێن کوردان و خرڤەکرنا ئایدلووژێن جودا لژێت چەترا کوردینێ دێ دەنگێ کوردان د سەر ژ نوی ئاڤاکرنا سیستەمێ سیاسیێ سوریایێ ب باندوور کەت و بیتە کاتالیساتورەکێ باش بو بەردەوامیدان ب دیالوگا کوردی/ کوردی دهەماندەما هێزا ڤێ دیالوگێ بو خواستەکا ئێکگرتی بەرامبەر دیمەشقا نوی.

 

سەروک بارزانی: رابەرێ نەتەوەیی

 

سەروک بارزانی هەردەم هەول دایە کو کوردان د جیهانەکا دابەشکریدا بپارێزیت و دەنگ و رەنگێن وان بکەتە ئێک. دیدارا دگەل مەزلوم عەبدی د سات و دەمێن هوسا هەستیاردا کو ل دەڤ گەلەک لایەنان مینا تشەکێ مەحال دهاتە دیتن ژبەر ئالووزیا سوریایێ لێ باندوورا سیاسی و دیپلوماسیا رێزدار سەروک بارزانی ژ سنور و جیاوازیێن ئایدلوژی دەربازببیت و هەولا دانانا بناغەیا وێ خەونا کوردان بکەتە ئێک کو چەندەها سالن کوردێن هەرچوار پارچەیێن کوردستانێ چاڤەرێ وێنە. د سەردەمەکێدا کو جیهان ب گشتی و روژهەلاتا ناڤەراست ب تایبەتی وەکو دەڤەرەکێ کو ململانێ چ دەمەکێ بەروکا وێ بەرنادەت سەروک بارزانی هەولا هندێ ددەت کو رێبازەکێ بو دیالوگ و دیپلوماسیێ ژ بو کوردان پەیدا بکەت چونکە ئێدی خەباتا سەروک بارزانی سنورێن ئایدلوژیێ دەرباز کرینە و وەکو رێبەرێ کوردان پاشەروژ و نەخشەیا سیاسی یا پرسا کوردان دیار دکەت.