نێچیرڤان بارزانی و سوودانی: پێویستە هەولێر و بەغدا ئەرکەکانیان بەگوێرەی یاسای بودجە جێبەجێ بکەن

ئاڤا نیوز

 

سەرۆکی هەرێمی کوردستان و سەرۆکوەزیرانی عێراق لە بەغدا کۆبوونەوە و دەڵێن، گفتوگۆیان لەبارەی باشترین ڕێکار کردووە بۆ ئەوەی هەردوو حکومەتی فیدڕاڵ و حکومەتی هەرێمی کوردستان ئەرک و پابەندبوونە هاوبەشەکانیان بەگوێرەی دەستوور و یاسای بودجە جێبەجێ بکەن.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاویکردەوە، محەممەد شیاع سوودانی سەرۆکوەزیران لە بەغدا پێشوازی لە نێچیرڤان بارزانی، سەرۆکی هەرێمی کوردستان کرد، لە کۆبوونەوەکەشدا دۆخی وڵات و ناوچەکە و پێویستی پشتیووانی هەوڵەکانی حکومەتی فیدڕاڵ تاوتوێ کراوە بۆ ئەوەی بتوانێت خواستەکانی هاووڵاتییان لە سەرانسەری وڵاتدا بەدی بهێنێت.

 

ئەوەشی خستووەتەڕوو، لەبەشێکی دیکەی دیدارەکەدا تاوتوێی دۆسیە خزمەتگوزارییەکانی پەیوەست بە بەرژەوەندی هاووڵاتییان و باشترین ڕێگا بۆ ڕێکخستنی پابەندبوونە هاوبەشەکانی نێوان حکومەتی فیدراڵی و هەرێم کراوە، لەسەر بنەماکانی دەستوور و ئەوەی لە یاسای بودجەدا پەسەندکراوە.

 

زانیاریی زیاتر: سەرۆکی هەرێمی کوردستان و سەرۆکوەزیرانی عێراق جەختیشیان لەگرنگی هەماهەنگی و هاوکاری هاوبەش لە نێوان سەرجەم هێز و لایەنە سیاسییەکان بۆ ڕووبەڕووبوونەوەی ئاستەنگییەکان کردووەتەوە، بەشێوەیەک کە بەرژەوەندی هەموو گەلی عێراق بەدی بهێنێت و ئاسایش و سەقامگیری و سەروەری نیشتمانیش پتەوتر بکات.