ڕۆژنامەیەکی ئەمریکی: ترەمپ بژاردەی هێرشکردنە سەر دامەزراوە ئەتۆمییەکانی ئێران تاوتوێ دەکات

ئاڤا نیوز

 

ڕۆژنامەیەکی ئەمریکی ئاشکرای دەکات، دۆناڵد ترەمپ بژاردەی هێرشی سەربازیی دژ بە دامەزراوە ئەتۆمییەكانی ئێران لەگەڵ ئیدارەی نوێی ئەمریکا تاوتوێ دەكات.

 

وێنە گەورەكە: دۆناڵد ترەمپ، سەرۆکی هەڵبژێردراوی ئەمریکا، پێویستی پێداچوونەوە بە سیاسەتی كۆشكی سپی بەرامبەر ڕۆژهەڵاتی ناوەڕاست لەگەڵ ئیدارە پێشنیازكراوەكەی باسكردووە، و پێیوایە سزای ئابووری زیاتر بخرێتە سەر ئێران و ئەو گرووپانەشی لێیەوە نزیکن، هەروەها فرۆشتنی چەكی پێشكەوتووش بە ئیسرائیل زیاتر بكات.

 

زانیاریی بەدەستهاتوو: بەگوێرەی ڕۆژنامەی وۆڵ ستریت جۆرناڵی ئەمریكی لە زاری كەسانی تیمە نوێیەکەی ترەمپ ئاشکرای کردووە، کە سەرۆکی هەڵبژێردراوی ئەمریکا لە بابەتی بژاردەی هێرشی سەربازیی ڕاستەوخۆ بۆ سەر دامەزراوە ئەتۆمییەكانی ئێران، لە هەموو كاتێك جددیترە و دوای ڕووخانی حكومەتەكەی بەشار ئەسەد، بۆ لەناوبردنی حیزبوڵڵای لوبنان و بزووتنەوەی حەماسیش هاوكاری زیاتری ئیسرائیل بكات.

زانیاریی زیاتر: ترەمپ نیگەرانی خۆی دەربڕیوە لەوەی ئێران لەماوەی سەرۆكایەتییەكەیدا پەنا بۆ بەكارهێنانی چەكی ئەتۆم ببات، بۆ ڕەوینەوەی ئەو مەترسیەش بەپێویستی دەزانێت هێرشی ڕاستەوخۆ بكرێتە سەر دامەزراوە ئەتۆمییەكانی ئەو وڵاتە.

 

باكگراوند: پێشتر ترەمپ لە دیدارێكی لەگەڵ گۆڤاری تایم ئەوەی دووپات كردەوە كە ئێران لەماوەی بانگەشەی هەڵبژاردنی سەرۆكایەتی هەوڵی تیرۆركردنی داوە.