بەرپرسێکی ئەمریکا بۆ سەرۆکوەزیران بارزانی: ئامادەین بۆ هاوکاری زیاتری ئەمنی و سەربازی

ئاڤا نیوز

 

سەرۆكوەزیران بارزانی پێشوازی  لە شاندێکی ئەمریكا، بە سەرۆکایەتی دانیێل شاپیرۆ جێگری یاریدەدەری وەزیری بەرگریی بۆ کاروباری ڕۆژهەڵاتی ناوەڕاست كرد، ئەمریكا پشتیوانی خۆی بۆ هەرێمی كوردستان و چاكسازییەكانی وەزارەتی پێشمەرگە دووپاتكردەوە.

ڕاگەیێنراوی فەرمی: لە کۆبوونەوەکەدا ئەلینا ڕۆمانۆوسکی باڵیۆزی ئەمریکا لە عێراق و جەنەراڵ جۆل ڤاوڵ، فەرماندەی گشتیی هێزەکانی هاوپەیمانان لە عێراق و سووریا و نیکۆل سۆفتنێس بەڕێوەبەری کاروباری عێراق و سووریا لە ئەنجوومەنی ئاسایشی نیشتمانی ئەمریکا ئامادەی بوون، گفتوگۆیان لەبارەی دوایین گۆڕانکاریی و پێشهاتەکانی عێراق و ناوچەکە کرد.

بابەتی ستراتیژی: جێگری یاریدەدەری وەزیری بەرگری ئەمریکا، پشتیوانیی وڵاتەکەی بۆ هەرێمی کوردستان و هێزی پێشمەرگە دووپات کردەوە و ئاماژەی بەوە دا هەرێمی کوردستان هاوبەشێکی گرنگ و ستراتیژی ئەمریکایە و خواستی وڵاتەکەشی بۆ پەرەپێدانی زیاتری هاریکاری و هەماهەنگیی ئەمنیی و سەربازی لەگەڵ حکومەتی هەرێمی کوردستان دەربڕی.

ئەوەی پێویستە بیزانیت: تەوەرێکی سەرەکی کۆبوونەوەکە، تاوتوێکردنی پێشکەوتنەکانی تایبەت بە چاکسازییەکانی وەزارەتی پێشمەرگە بوو، جێگری یاریدەدەری وەزیری بەرگری ئەمریکا ، سوپاسی هەوڵ و کارکردنی بەردەوامیی كردین بە ئاراستەی سەرخستنی چاکسازییەکان و یەکخستنی هێزی پێشمەرگە و ئاماژەی بەوەدا ئەمریکا و هاوپەیمانیی نێودەوڵەتیی، بەردەوام دەبن لە پشتیوانیکردنی هێزی پێشمەرگە بۆ ڕووبەڕووبوونەوەی هەڕەشەکانی تیرۆر، سەرۆكوەزیران بارزانی جەختی لە پتەوکردنی پەیوەندیی دوولایەنە لە بوارە جۆراوجۆرەکاندا کردەوە.