چەند بەربژێرێکی کورد بۆ پەرلەمانی ئەوروپا لە ئاڤاوە پەیام ئاڕاستە دەکەن

ئاڤا نیوز

 

حەوت کورد بۆ ئەندامێتیی پەرلەمانی ئەوروپا بەربژێرن، چواریان ژنن و داوای دەنگپێدان لە کوردانی ئەوروپا دەکەن.

 

وێنە گەورەکە: باریکان ئیسماعیل و دیانە غەفوور، دوو کچی کوردی هەرێمی کوردستانن، ئەوان لە ئەوروپا دەژین و بەربژێرن بۆ ئەندامێتیی پەرلەمانی ئەوروپا و لەڕێگەی ئاڤا نیوزەوە، داوا لە کوردانی ئەوروپا دەکەن پشتیوانیان بن تا دەنگی پێویست بۆ سەرکەوتن بەدەست بهێنن. 

 

ئەوەی پێویستە بیزانیت: هەریەکە لە ئۆزلەم دەمیرەل، تانەر گەنج، ئیبراهیم بەنلی، دیانە غەفوور، ئەڤین ئینجیر، باریکان ئیسماعیل و هەدیە تەمیز، بەربژێرن بۆ ئەندامێتیی پەرلەمانی ئەوروپا.

 

درێژەی ڕاپۆرت

 

دوو هەزار بەربژێر، کێبڕکێ بۆ بەدەستهێنانی 730 کورسی دەکەن

لە 27 وڵاتی ئەوروپا، هەڵبژاردن دەکرێت و سەرووی 370 ملیۆن کەس، مافی دەنگدانیان هەیە. دوو هەزار بەربژێر، کێبڕکێ بۆ بەدەستهێنانی 730 کورسی دەکەن و پڕۆسەی هەڵبژاردن سێ هەفتە بەردەوام دەبێت.

 

بەربژێرەکان قسە بۆ ئاڤا نیوز دەکەن

دیانە غەفوور، بۆ ئاڤا نیوز گوتی: "تەمەنم 26 ساڵە و لەدایکبووی وڵاتی سوێدم. لە تەمەنی 14 ساڵییەوە ئەندامی گەنجانی سۆسیال دیموکراتی سوێدم.  ئێستا بەربژێرم بۆ پەرلەمانی ئەوروپا و داوای دەنگ لە کوردەکان دەکەم".

 

باریکان ئیسماعیل، یەکێکی دیکەیە لە بەربژێرە کوردەکان بۆ ئەندامێتیی پەرلەمانی ئەوروپا، ئەو کە لە هۆڵەنداوە خۆی بەربژێر کردووە، بە ئاڤا نیوزی گوت: "دەمەوێت لەم هەڵبژاردنەدا براوەبم، بۆ ئەوەی بتوانم کار لەسەر دۆزی گەلی کورد بکەم".

 

هەدیە تەمیز، کچە کوردێکی باکووری کوردستانە، دەربارەی کارنامەکەی خۆی بە ئاڤا نیوزی گوت: "دەمانەوێت کورد لۆبییەکی بەهێزی هەبێت و بە مافەڕەواکانی بگات، بۆیەیش ئێمە کار لەسەر دۆزی کورد دەکەین".