هونەرمەندێكی مەغریبی بەتۆمەتی بڵاوکردنەوەی وێنە و نهێنیی هونەرمەندان دەستگیردەکرێت

ئاڤا دیجیتاڵ

دونیا بەتمە، هونەرمەندی مەغریبی بەتۆمەتی بڵاوکردنەوەی وێنە و نهێنی خەڵک لە هەژمارێکی ساختەدا دەستگیرکرا و بە ساڵێک زیندانیکردن سزادرا. 

 

وێنە گەورەکە: دونیا بەتمە بە دانانی هەژماری ساختە و بڵاوکردنەوەی وێنە و نهێنیی خەڵک و هونەرمەندانی دیکە تۆمەتبار کراوە و ئێستاش دەستیگیرکراوە.

 

لێدوانی فەرمی: میدیا عەرەبییەکان لە زاری دادوەری لێکوڵینەوە بڵاویانکردووەتەوە: ئێوارەی ڕۆژی چوارشەممە 31-01-2024، پۆلیسی مەغریب هونەرمەند دونیا بەتمەیان لە شاری کازابلانکای ئەو وڵاتە دەستگیرکردووە، دادوەری لێکۆڵینەوەی دۆسیەکە بۆ ئەلعەرەبیە گوتی: بەڵگەی پێویست بۆ سەلماندنی سزای دونیا و خوشکەکەی هەیە بەتاوانی بەشداریکردن لە کۆکردنەوە و بڵاوکردنەوەی گوتە و وێنەی خەڵک.

 

زانیاریی زیاتر: لە ساڵی 2020 دادگەی بەرایی یەکەم لە مەراکش سزای زیندانیکردنی 8 مانگی بۆ دونیا دەرکردبوو، دواتر بڕیاری دادگەی تێهەڵچوونەوە دەرچوو، کە 4 مانگی دیکە بۆ سزای زیندانیکردنی زیاد کرد، بەمەش ماوەکەی دەبێت بە ساڵێکی تەواو.

 

ئەوەی پێویستە بیزانیت: ئەم بابەتە لە ساڵی 2019 سەریهەڵداوە، کە ئەم هونەرمەندە هەستاوە بە دروستکردنی هەژمارێکی ساختە و نادیار لە تۆڕی کۆمەڵایەتی سناپچات بەناوی "حەمزە موون بیبی" و لە ڕێگەی ئەو هەژمارەوە وێنە و زانیاری نهێنی بەشێک لە هونەرمەندانی بەغریب بڵاوکردووەتەوە و لە کەسایەتییانی داوە.

 

کاریگەری و لێکەوتەکان: ئەم بابەتە بوو بە جێگەی باس و خواسی مەغریبیەکان و جیهانی عەرەبی و هەر زوو تۆمەتی ئەم کارە خرایە پاڵ هونەرمەند دونیا بەتمە و خوشکەکەی بەناوی ئیبتیسام بەتمە کە کاری مۆدەی جلوبەرگ دەکات. ئەو هەژمارە ساختەیە زۆرێک لە هونەرمەند و کەسایەتی دیاری مەغریبی بەئامانج گرت و بوونە قوربانی ئەو هەژمارە ساختەیە، کە سەرەتا هاکی هەژماری ئەو کەسانەی دەکرد، دواتر شتی نهێنی و هەستیار لەسەر ژیانیان بڵاوکردووەتەوە، بەو هۆیەوەش هاوسەرگیریەک دوای دوو ڕۆژ هەڵوەشاوەتەوە و یەکێکی دیکەش تووشی جەڵتەی دڵ بووە.