خەڵاتی ماندێلا دەبەخشرێتە چاکسازیی ئافرەتان و نەوجەوانانی دهۆک

ئاڤا دیجیتاڵ

لە بەرامبەر ئەو خزمەتەی پێشکەشی زیندانیکراوەکانیان کردووە، تۆڕی دادپەروەری بۆ بەندییەکان لە عێراق، خەڵاتی ماندێلای بۆ ساڵی 2023 بەخشییە بەڕێوەبەرایەتیی چاکسازیی ئافرەتان و نەوجەوانانی دهۆک.

بۆچی گرنگە: خەڵاتی ماندێلا بریتییە لە بەرزترین خەڵات کە ساڵانە لە عێراق، لەڕێگەی تۆڕی دادپەروەری بۆ بەندییەکان دەدرێت بەو کەس و دامەزراوانەی خزمەتێکی گەورە پێشکەش بە دەستگیرکراوان و سزادراوان دەکەن لە زیندانەکاندا.

چیرۆکی سەرەکی: رۆژی سێشەممە 30-1-2024، لە دیوانی وەزارەتی کار و کاروباری کۆمەڵایەتی، بە ئامادەبوونی زەكیە سید ساڵح، بریکاری وەزارەت و ئیحسان عەبدولرەحمان، بەڕێوەبەری گشتیی چاكسازی، تۆڕی دادپەروەری بۆ بەندییەکان خەڵاتی ماندێلای بۆ ساڵی 2023 بەخشییە بەڕێوەبەرایەتیی چاکسازیی ئافرەتان و نەوجەوانانی دهۆک.

لێدوانی فەرمی: هەڵات عەبدولکەریم، بەڕێوەبەری چاکسازی ئافرەتان و نەوجەوانانی دهۆک بە ئاڤا میدیای گوت: "لە ماوە ڕابردوو تۆڕی دادپەروەری بۆ بەندییەکان لیژنەیەکی پێکهێنا بەمەبەستی ئاگاداربوون و هەڵسەنگاندن بۆ رەوشی چاکسازییەکانی عێراق، بۆیان دەرکەوتووە چاکسازی ئافرەتان و نەوجەوانانی دهۆک، تاکە چاکسازییە پابەندە بە سەرجەم بەندی یاسایی و رەچاوکردنی مافەکانی مرۆڤ و باشترین خزمەت پێشکەش بە سزادراوان دەکات."

ئەوەی پێویستە بیزانیت: تۆڕی دادپەروەری بۆ بەندییەکان لە ساڵی 2007 دامەزراوە، لەسەر ئاستی عێراق خزمەتگوزاری پێشکەش بە زیندانییەکان دەکات لە بواری مافەکانی مرۆڤ و هاوکاریکردنی دەزگا فەرمییەکانی دەوڵەت لە دانانی یاسا بەگوێرەی ستاندارە نێودەوڵەتییەکان و پێوانەکانی مافی مرۆڤ.

باکگراوند: لە چاکسازیی ئافرەتان و نەوجەوانانی دهۆک 120 سزادراو و راگیراو هەن، کە پێکدێن لە  70 ئافرەت و 45 نەوجەوان، جگە لەوەی زیاتر لە 20 منداڵی خوار تەمەن سێ ساڵ لەو چاکسازییە لای دایکیان دەمێننەوە.