ئیسرائیل وەڵامی حەماس دەداتەوە و هێرش دەکاتە سەر ڕەفەح

ئاڤا نیوز

دوای ئەوەی حەماس بڕیاری قبووڵکردنی پێشنیازەکانی ڕاگەیاند، کابینەی بەرگریی ئیسرائیل کۆبووەوە و" بڕیاری هێرشکردنە سەر ڕەفەح"ـی دا.

 

وێنە گەورەکە: کەمێک لەمەوبەر، کۆبوونەوەی نائاسایی کابینەی بەرگریی ئیسرائیل کرا و بە کۆی دەنگ بڕیار درا ئۆپەراسیۆنی سەربازی لە شاری ڕەفەح بەردەوام بێت کە ئاوارەکانی فەلەستینی تێدایە.

 

ئەوەی ئێستا ڕوودەدات: کەناڵی 14ـی ئیسرائیلی بڵاوی کردەوە، سوپای ئیسرائیل هێرشی لە ڕەفەح دەست پێ کردووە، هێزێکی زەمینی بۆ ناوچەی ڕۆژهەڵاتی شارەکە جووڵەی پێ کراوە. 

 

گۆشەیەکی دیکەی دیمەنەکە: هەرچەندە پێشنیازەکەی حەماس دوورە لە مەرجە پێویستەکانی ئیسرائیل، بەڵام ئیسرائیل شاندێکی نێوەندگیری دەنێرێت بۆ ئەوەی ئەگەری گەیشتن بە ڕێککەوتنێک لە ژێر مەرجێکدا کە ئیسرائیلیش قبووڵی بکات، تەواو بکرێت.

 

لەلایەکی دیکەوە: لە ڕاگەیێنراوی سوپای ئیسرائیلدا هاتووە، هێزەکانی بەرگریی ئیسرائیل بە شێوەیەکی ئامانجدار لە ناوچەی ڕەفەحی ڕۆژهەڵات هێرش دەکەنە سەر ئامانجەکانی حەماس.