چوار وێستگەی پێوانەکردن و هەڵسەنگاندنی هەوا لە هەولێر جێگیر دەکرێن

ئاڤا نیوز

 

دەستەی ژینگەی حکومەتی هەرێمی کوردستان، چوار وێستگەی هەڵسەنگاندن لە سنووری پارێزگای هەولێر جێگیر دەکات، کە پێش هاتنی خۆڵبارین سیستەمەکە ئاگادارکردنەوە دەردەدات.

 

بۆچی گرنگە: سیستەمەکە تایبەتە بە ئاگادارکردنەوەی پێشوەختە لە بڵاوبوونەوەی گاز و تیشکە زیانبەخشەکان لە هەوادا، هەر تیشکێک لە هەوادا بڵاوبووبێتەوە، پێشوەختە لە پیسبوونی هەوا ئاگاداری دەدات.

 

لێدوانی فەرمی: ئەحمەد محەممەد، بڕیاردەری ئەنجوومەنی باڵای ژینگەی هەرێمی کوردستان بە ئاڤا نیوزی گوت: "پڕۆژەکە ڕەوانەی ئەنجوومەنی وەزیران کراوە، دوای گەڕانەوەی لە چوار شوێنی جیاوازی پارێزگاکە جێگیر دەکرێن."

 

ئەوەی پێوستە بیزانیت: دانانی ئەو سیستەمە کار ئاسانی دەکات، بۆئەوەی ڕادەی پیسی هەوای سنووری پارێزگای هەولێر دیاری بکرێت و بە پلان کار لەسەر کەمکردنەوەی کاریگەرییەکەی بکرێت.