داهاتی ناوخۆ و میزان موراجەعە ڕەوانەی بەغدا دەکرێت

ئاڤا نیوز

 

وەزارەتی دارایی و ئابووری هەرێمی کوردستان، داهاتی ناوخۆ و لیستی مووچە و میزان موراجەعە ڕادەستی وەزارەتی دارایی فیدراڵ دەکات، بەمەبەستی ئەوەی هەرچی زووە بەغدا شایستەی دارایی مانگی چوار بۆ مووچەخۆران بنێرێت.

 

وێنە گەورەکە: هەوڵەکانی وەزارەتی دارایی بۆ خەرجکردنی مووچەی مانگی چوار لە کاتی خۆی بەردەوامە، بۆ ئەم مەبەستە هەموو ڕێککارەکان جێبەجێ کراون و ئەوەی دەمێنێتەوە پەیوەستە بە بەغداوە.

 

زانیاریی تایبەت: سەرچاوەیەک لە وەزارەتی دارایی و ئابووری حکومەتی هەرێمی کوردستان بە ئاڤا میدیای ڕاگەیاند: ئێستا سەرقاڵی لێکۆڵینەوەی دارایین لەگەڵ بانکەکاندا بۆ داهاتی ناوخۆ، چاوەڕوانی ئەنجامی بانکەکانین، چونکە پارەکە ئامادەیە و نزیکەی 49 ملیار دینار دەبێت.

- ئامادەکردنی لیستی مووچە ئەمڕۆ تەواو دەبێت، میزان موراجەعەش ئامادەیە، ئەمڕۆ یاخود ئێوارەی ڕۆژی دووشەممە دەیبەین بۆ بەغدا. 

- ئەگەر هاتوو لێکۆڵینەوە و پێداچوونەوە لەگەڵ بانکەکان ئەمڕۆ تەواوبێت، ئێوارە داهاتی ناوخۆ دەخەینە سەر هەژماری لقی هەولێر بانکی ناوەندی عێراق، بەڵام گەر هاتوو تەواو نەبوو سبەی بەیانییەکەی ڕادەست دەکرێت.