نرخی ڕۆن و گازوایل بەشێوەیەکی بەرچاو بەرز دەبێتەوە

ئاڤا نیوز

ماوەیەکە بەهۆی نزیکبوونەوەی کاتی هەناردەکردنەوەی نەوتی کوردستان، لە بازاڕی فرۆشتنی سووتەمەنی نرخی ڕۆن و گازوایل بەشێوەیەکی بەرچاو بەرز بووەتەوە.

زانیاریی پەیامنێر: ئاڤا میدیا لەگەڵ یەکێک لە فرۆشیارانی سوتەمەنی هەولێر قسەی کردووە، دەڵێت:

- ئەو کاتەی پەرلەمانی عێراق یاساکەی پەسەندکرد و پرسی هەناردەکردنەوەی نەوتی کوردستان گەرم بوو، هەر تۆنێک گازوایل 50 دۆلار سەرکەوت. هەر تۆنێک لە 390 دۆلار تا 440 دۆلار بەرز بووەتەوە.

- دوو ساڵ لەمەوبەر ئەو کاتەی نەوتی هەرێمی کوردستان هەناردە دەکرا، هەر تۆنێک گازوایل تا 700 دۆلار ڕۆیشت. ئێستاش ئەگەر نەوت هەناردە بکرێتەوە، لەماوەی چەند ڕۆژێک هەر تۆنێک گازوایل تا 500 دۆلار دەڕوات.

زانیاریی تایبەت: بەگوێرەی بەدواداچوونی ئاڤا، پاڵاوگەکانی هەولێر هۆکاری بەرزبوونەوەی نرخی گازوایل دەگەڕێننەوە بۆ کەمبوونەوەی نەوتی ڕەش لە بازاڕ، ئەگەر نەوت هەناردە بکرێتەوە، پاڵاوگەکان بە زەحمەت نەوتی ڕەشیان دەستدەکەوێت.

ئەوەی پێویستە بیزانیت: لەبازاڕی فرۆشتنی سووتەمەنی کوردستان چەندین جۆر گازوایل دەفرۆشرێن، تا ماوەیەک لەمەوبەر هەیان بوو لەلایەن پاڵاوگە نایاساییەکان بەرهەم دەهاتن، ئەوانە بەهۆی ڕێکارەکانی پارێزگا و دەستەی ژینگە نەماون، جۆرێکی دیکە گازوایلی کارە کە لە ڕووی کوالێتییەوە باشترین جۆرییەتی و نرخی لەوانی دیکە بەرزترە و هەر تۆنێکی تا 450 دۆلار دەبێت.