بەهۆی بەخاکسپاردنی حەسەن نەسرووڵڵا لە چەند پارێزگایەکی عێراق دەکرێتە پشووی فەرمی

ئاڤا نیوز

 

بڕیارە بەهۆی بەخاکسپاردنی حەسەن نەسروڵڵا، ئەمینداری گشتیی پێشووی حیزبوڵڵای لوبنان، سبەی یەکشەممە لە چەند پارێزگایەکی عێراق دەکرێتە پشووی فەرمی.

 

وێنە گەورەکە: هاوکات لەگەڵ ڕێوڕەسمی بەخاکسپاردنی حەسەن نەسروڵڵا، ئەمینداری گشتیی پێشووی حیزبوڵڵا لە بەیرووتی پایتەختی لوبنان، بڕیارە لە بەغدای پایتەخت و کەربەلا و چەند شوێنێکی دیکەی عێراق ڕێوڕەسمی بەخاکسپاردن بەشێوەی سیمبولی بەڕێوەبچێت.

 

ڕاگەیێنراوی فەرمی: بەگوێرەی ڕاگەیێنراوێکی پارێزگای بەغدا، بە پشتبەستن بە بڕیاری ئەنجوومەنی پارێزگا بڕیاردرا سبەی یەکشەممە دەوامی فەرمی لە دیوانی پارێزگا و فەرمانگەکانی سەر بە پارێزگا ڕابگیرێت.

 

لەلایەکی دیکە: لە ئەنجوومەنی پارێزگای زیقار، بڕیاردرا ڕۆژی یەکشەممە 23-2-2025، دەوام ڕابگیرێت و داوا لەلایەنە پەیوەندیدارەکانیش دەکات ڕێوڕەسمی بەخاکسپاردنەکەی نەسڕوڵڵا لە شاشە سەرەکییەکانی پارێزگاکە بگوازنەوە.

 

ئەوەی پێویستە بیزانیت: بڕیارە سبەی یەکشەممە 23-2-2025 ڕێوڕەسمێکی فەرمی بە بەشداری سەدان هەزار کەس لە دەیان وڵاتەوە بەخاکسپاردنی حەسەن نەسروڵڵا، ئەمینداری گشتیی پێشووی حیزبوڵڵا لە بەیرووتی پایتەختی لوبنان بەڕێوە بچێت.

 

ئەمەش بزانە: بەگوێرەی هەواڵێکی ئاژانسی فرانس پرێس دەیان بەرپرس و هەزاران هاووڵاتی عێراقی بەشداری لە ڕێوەڕەسمەکە دەکەن و لە 20ی شوباتیشەوە، هێڵی ئاسمانیی عێراقی گەشتەکانی بۆ لوبنان دوو هێندە کردووە.