ئەو هاووڵاتیەی 21 ساڵ لە ئەفریقا ونببوو بە كەسوكارەكەی شاد دەبێتەوە

 

ئاڤا نیوز

دوای 21 ساڵ لە بێ سۆراغبوونی، دواجار سەیفوڵڵا حوسێن، بە كەسوكارەكەی لە شارۆچكەی سەروچاوەی سەر بە ئیدارەی ڕاپەڕین، شاد دەبێتەوە.

چیرۆكی سەرەكی: هاووڵاتی سەیفوڵڵا حسێن، بەر لە 28 ساڵ بەمەبەستی گەیشتن بە وڵاتانی ئەوروپا، شارۆچكەی سەروچاوە لە ئیدارەی ڕاپەڕین جێدەهێڵێت و ئەوكات چووەتە وڵاتی كینیا لە كیشوەری ئەفریقا و تا كۆتاییەكانی ساڵی 2003 پەیوەندیی بە كەسوكارەكەی هەبووە، پاشان لە ساڵی 2004ـەوە کەسوکارەكەی لێی بێ سۆراغ دەبن و وای بۆدەچن لەژیاندا نەماوە، جگە لە دایکی کە بەردەوام ئومێدی وابووە بگەڕێتەوە.

چی ڕوویدا: سەیفوڵڵا بەبێ ئاگاداری كەسوكارەكەی ماوەی 17 ساڵ لە گرتووخانەكانی وڵاتی كینیا دەمێنێتەوە، پاشان براكەی لەڕێگەی بەڕێوەبەری گشتی پاسپۆرتی سلێمانییەوە زانیارییان لەبارەی دەستدەكەوێت كە لە وڵاتی كینیا زیندانی بووە ئێستاش ئازادكراوە و تەندروستی باشە. دواجار لەڕێگەی هاورێیەکی و بەرێوەبەری پاسپۆرتی سلێمانی، دوای ساڵانێكی زۆری دڵتەنگی و فرمێسك ڕشتن، بە كەسوكارەكەی شادبووەوە. 

لێدوانی فەرمی: پەیامنێری ئاڤا لەساتەوەختی شادبوونەوەی سەیفوڵڵا بە كەسوكاری، لە ماڵەكەی بوو، سەیفوڵا بۆ ئاڤا قسەی كرد و گوتی: ''زۆری بیری کەسوکار و خاک و نیشتمانم دەکرد و ئێستاش چاوەروانی بەفر بارینم".

زانیاریی زیاتر: ئەو هاووڵاتیە ماوەی دوو ساڵە لەگەل کچێکی موسوڵمانی ئۆگەندی هاوسەرگیری کردووە و خاوەنی منداڵێکەوە وابڕیارە بۆ ئەبەدی لە هەرێمی کوردستان بمێننەوە .