بازرگانانی كوردستان لە وەرگرتنی ڤیزای ئیمارات کێشەیان بۆ دروست دەبێت

ئاڤا نیوز

لە ناوەڕاستی مانگی هەشتی ساڵی 2024ەوە وڵاتی ئیمارات ڤیزا بە هاوڵاتیانی سینگڵی كوردستان و عێراق نادات، ئەوانەشی كاری بازرگانی دەكەن كێشەیان بۆ دروست بووە.

چیرۆکی سەرەکی: وڵاتی ئیمارات نزیکەی شەش مانگ دەبێت، بڕیارێکی دەرکردووە کە  ڤیزا بە هاوڵاتیانی سینگڵی كوردستان و عێراق نەدرێت، بازرگانان بڕیارەکە بۆ چەند هۆکارێک دەگەرێننەوە، بەڵام حكومەتی ئیمارات هیچ ڕوونكردنەوەیەكی فەرمی بە ئۆفیسەكانی فرۆشتنی ڤیزا لە هەرێمی كوردستان و عێراق نەداوە.

لێدوانە فەرمییەکان:

- سەعد قادر، یەکێک لەو کەسانەی کە کاری بازرگانی لە دوبەی دەکات، بە ئاڤا میدیای ڕاگەیاند، "کێشەکە پەیوەندی بە كارتی بانكی و جیاوازی نرخی دۆلار بۆ گەشتیار و هاووڵاتیانی ناوخۆی عێراق هەیە كە ماوەیەك دەچوون بۆ ئیمارات و دۆلاریان بە نرخی فەرمی بانک لە فڕۆكەخانە وەردەگرت و دواتر لە ئیمارات ڕایاندەكێشا كە 100 دۆلار بە 132 هەزار دیناربوو، ئێستا ئیمارات ڤیزا تەنیا بە خانەوادەكان دەدات"

- ئیسماعیل محەممەد، خاوەنی نووسینگەی دابینكردنی ڤیزایە لە هەولێر، بە ئاڤا میدیای ڕاگەیاند: نوێترین بڕیار كە ئێستا دراوە سەبارەت بە پێدانی ڤیزا، پیاو دەبێت تەمەنی 43 ساڵ بێت و ژنیش لە سەرووی 18 ساڵ بێت، ئەو کاتە دەتوانن ڤیزا وەربگرن و بە تەنیا سەفەر بكەن.

- مەعروف عەزیزخان هەرکی، جێگری سەرۆکی ژووری بازرگانی و پیشەسازی هەولێر، بە ئاڤا میدیای ڕاگەیاند: پێشتر كێشەكەمان گەیاندووەتە كونسڵخانەی ئیمارات لە هەولێر و لەبارەی گرفتەكە گفتوگۆمان لەگەڵیان کردووە، هەفتەی داهاتووش چاوپێکەوتمان هەیە لەگەڵ کونسڵی ئیمارات لە هەولێر کە چەند پێشنیازێکمان هەیە بۆ چارەسەرکردنی کێشەکە، یەکێک لەو پێشنیارانە ئەوەیە هەر بازرگان و خاوەنکارێک ئەگەر دەیەوێت ڤیزا وەربگرێت، ئێمە لە ژووری بازرگانی بە فەرمی پشتگیری بۆ دەکەین، بۆ ئەوەی بە ئاسانی ڤیزەکەی بۆ بگەڕێتەوە.