ئامادەکردنی پلانی کشتوکاڵی بۆ ڕووبەری داچێنراوی گەنم دوادەخرێت

ئاڤا نیوز

23 ڕۆژ لەبەردەم پارێزگاکان ماوە، بۆ ئەوەی پلانی کشتوکاڵی ساڵانەیان بە دیاریکراوی ڕووبەری داچێنراوی گەنم ڕادەستی وەزارەتی بازرگانی عێراق بکەن، هەولێریش چاوەڕێی دوایین باران دەکات بۆ پۆلینکردنی زەوییەکان پێش ئەوەی بینێرێت.

وێنە گەورەکە: کەمبارانی ئەمساڵ کاریگەری نەرێنی خستووەتە سەر داچاندنی گەنم لە ناوچەکانی هەرێمی کوردستان و عێراق. لە هەولێر 15%ـی ئەو ڕێژەیەی لە ساڵی ڕابردوو داچێنراوە کەم بووەتەوە، لەکاتێکدا وەزارەتی بازرگانی بڕێکی دیاریکردووە بۆ ئەوەی ئەمساڵ لە سایلۆکانی وەرگرێت، بەگوێرەی ڕووبەری داچێنراویش ئەو بڕە گۆڕانکاری بەسەردا دێت.

لێدوانی فەرمی: هێمن سەید موراد، بەڕێوەبەری گشتی کشتوکاڵی هەولێر بۆ ئاڤا گوتی، "ئامادەکردنی پلانی کشتوکاڵیمان دواخستووە، بۆ ئەوەی سوود لەم بارانەش وەرگرین بۆ فراوانکردنی ڕووبەرەکە، دوای ئەوە پۆلینکردنی رووبەری داچێنراو لەگەڵ ژمارەی جووتیاران دەستپێدەکەین."

ئەمەش بزانە: ساڵی ڕابردوو 16 هەزار و 799 جووتیار لەسنووری هەولێر 900 هەزار تۆن گەنم بەرهەمیان بوو، ئەمساڵ پێشبینی دەکرێت بڕەکە بۆ 700 هەزار تۆن کەم ببێتەوە.

باکگراوند: بەگوێرەی پلانی کشتوکاڵی عێراق، لەمساڵدا پشکی هەرێمی کوردستان بە 400 هەزار تۆن دیاریکراوە، هاوکات 15-03-2025 وەکو دوایین وادە دیاریکراوە بۆ ئەوەی سەرجەم پارێزگاکان ڕووپێوی زەوی بکەن.