دەستپاکی عێراق ئامارێکی گەندەڵی مەترسیدار بڵاودەکاتەوە

 

ئاڤا نیوز

دەستەی دەستپاکی عێراق، ڕاپۆرتی ساڵانەی خۆی لەبارەی دۆسیەکانی گەندەڵی بۆ ساڵی 2024 لە سەرتاسەری عێراق جگە لەهەرێمی کوردستان بڵاوکردەوە.

وێنە گەورەکە: بە گوێرەی ڕاپۆرتی ڕێکخراوی شەفافییەتی جیهانی، لە ڕیزبەندی شەفافییەتی وڵاتان، پلەبەندی عێراق بۆ 140ـەمین دابەزی و لە سەر ئاستی وڵاتانی عەرەبیشدا لە پلەی هەشتەمدایە، بەمەش لە ساڵی 2024ـدا پێچەوانەی شەفافییەت، عێراق لە پلەی گەندەڵی پێشکەوتنی تۆمارکردووە و گەندەڵی تێدا زیاتر گەشەی کردووە.

ڕاگەیێنراوی فەرمی: لە بەیاننامەیەکدا دەستەی دەستپاکی عێراق ڕایگەیاند: لە ماوەی ساڵی 2024 ـدا دەستەکەیان ڕێگری لە هەدەردانی نزیکەی 950 ملیار دینار و زیاتر لە نۆ ملیار دۆلار کردووە.

٠ پێداچوونەوەی بۆ 71 هەزار و 823 ڕاپۆرت و دۆسیەی گەندەڵی کردووە و 19هەزار و 683 فەرمانی دەستگیرکردن و بانگهێشتکردن و دەستبەسەرکردنی دەرکردووە.

٠ بە هاوکاری لەگەڵ دەسەڵاتی دادوەری، 48 فەرمانی بانگهێشتکردن و دەستگیرکردنی بۆ وەزیر و ئەوانەی لەپلەی وەزیرن و 418 فەرمانی دەستگیرکردنی بۆ فەرمانبەری پلە تایبەت دەرکردووە.

٠ بەتۆمەتی تێوەگڵان بەگەندەڵی  12 هەزار و 994 کەس، لە نێویاندا 18 وەزیر و ئەوانەی پلە هاوشێوەیان هەبووە ڕەوانەی دادگا کراون.