سوپاس ئاڤا، جارێکی دیکە فەرهاد پیرباڵت پێ ناساندینەوە

 

ساڵانێکە میدیایی کوردی بەشێوەیەکی نەزانانە خەریکی ناشیرنکردنی د.فەرهاد پیرباڵە، فەرهادێک کە تەواوی تەمەنی خۆی بۆ لێکۆڵینەوە و گەڕان بەدوای مێژوو و ئەدەب و هونەری گەلەکەی تەرخان کردووە و دڵسۆزانە و ماندوو نەناسانە، سەرقاڵی هۆشیارکردنەوەی کۆمەڵگە و تاکی کوردە، کەچی میدیا بێ مۆڕاڵ و بێ ستراتیژییەکان دەهاتن و ماندوویی و توڕەییەکانی فەهادیان دەقۆستەوە بۆ زیادکردنی ژمارەی لایک و بینەری خۆیان.!

 

لە ڕابردوودا بەشێک لە میدیاکانی کوردستان، لەبری ئەوەی هاوکاری فەرهاد پیرباڵ بکەن بۆ تێپەڕاندنی ئەو دۆخە سەخت و تاقەت پڕوکێنەی کە ساڵانێکە گیرۆدەی بووە، لەبیری ئەوە دەهاتن و ئەو بیرمەند و پیاوە جوانەیان وەکو شێت و نەزانێت پێ دەناساندین.!

 

بەڵام سوپاس بۆ ئاڤا، کە دوای بڕیاری خانەنشین بوونی فەرهاد پیرباڵ، لە پڕۆگرامێکی شایستە و پیشەییانەدا، جارێکی دیکە پیرباڵی ڕاستەقینەی پێ ناساندینەوە.

 

پیرباڵ لەو پڕۆگرامەدا زۆر بەوردی و ژیریی، بە ئاست بەرزیی زانستی و بیرکردنەوەی خۆی، وەڵامی پرسیارەکانی پێشکەشکارەکەی دەدایەوە بە دەربڕینێکی زۆر جوان و پڕچێژ، وەڵامی پرسیارەکانی پەیوەست بە ژیان و بەرهەم و بۆچوونەکانی خۆی دەخستەڕوو. 

 

زۆرجار بەندە، ڕەخنەم لە بێسەروبەری میدیاکانی کوردستان گرتووە، بۆیە لێرە بە پێویستی دەزانم لەپای هەر کارێکی باش و پیشەییانە سوپاس و ستایش دەرببڕم، لەپێناوی کاری باشتر و ئاڕاستەی دروستی پیشەیی میدیایی. 

 

دووبارە سوپاس بۆ ئاڤا، ئافەرینێکیش بۆ شانۆ بەکر فەرەج، کە پێشکەشکاری بەرنامەکە بوو، دوور لە پرسیاری دووبارە و بێزارکەر و یاریکردن بە هەست و سۆز، بە پرسیاریی باش و لۆژیکی و بەشێوەیەکی ئەخلاقی و پیشەییانە، توانیبووی کەشێکی لەبار و گونجاو بۆ میوانەکەی دروست بکات، کە پیرباڵی ئازیز بتوانێت تێیدا وەڵام و بۆچوونەکانی خۆی بە شێوازی تایبەتی خۆی و بە پوخت و دروست و ڕەوان بخاتەڕوو.