دوای بەدواچوونەکانی ئاڤا لە ماوەی مانگێکدا زیاتر لە 50 بەنزیخانە سزا دەدرێن

ئاڤا نیوز

دوای بەدواداچوونە بەردەوامەکانی ئاڤا لەبارەی بەنزین، چاودێریکردنی بەنزینخانەکان چڕبووەتەوە، تەنیا ئەم مانگە هەزار و 800 جار سەردانی بەنزینخانەکان کراوە و 50 دانەشیان سزا دراون یان داخراون.

زانیاریی تایبەت: دوای بەدواداچوونەکانی ئاڤا میدیا لەبارەی خراپی کوالێتی بەنزین لە بەشێکی بەنزینخانەکانی هەولێر،  لیژنەکانی چاودێری کارەکانیان تووندتر کردووە، بۆ ئەم مەبەستە ژمارەیەک بەنزینخانەیان ڕووبەڕووی سزای دارایی کردووەتەوە و ژمارەیەکیشیان داخستووە.

زانیاریی زیاتر: دوای بەدواداچوونەکانی لیژنەکانی چاودێری و سزادانی ژمارەیەک بەنزینخانە، ئێستا کوالێتی بەنزین باشتر بووە و سکاڵاکانیش کە پێشتر ئاراستەی ئاڤا دەکران، کەمتر بوونەتەوە.

ئەوەی پێویستە بیزانیت: تەنیا لەم مانگەدا هەزار و 800 جار سەردانی 285 بەنزینخانە کراوە، لەو ژمارەیەدا 50 بەنزینخانە سزای دارایی دراوە یان بۆ ماوەیەک داخراون.

لەلایەکی دیکەوە: بەڕێوەبەرایەتیی نەوت و کانزاکانی هەولێر بە ئاڤا میدیای ڕاگەیاندووە،

- "هەندێک بەنزینخانە کە داخراون، بەهۆی ئەوەی جۆرێک فێڵیان کردووە کە لە ڕێگەی ماددەی کیمیایییەوە وایان کردووە بەنزینی خراپ بە کوالێتی باش لە تاقیگەکان بخوێنرێتەوە".

- "لەبارەی ئەو بەنزینە خراپەشی دەستی بەسەردا دەگیرێت، بەنزینەکە لەنێودەبرێت بۆ ئەوەی بۆ هیچ شتێک سوودی لێ وەرنەگیرێت".

ئەمەش بزانە: لە دهۆک و زاخۆ 227 بەنزینخانەی حکومی و ئەهلی هەن، لە مانگی یەک حەوت بەنزینخانە لە دهۆک سزادراون، بەڵام لە زاخۆ بە وتەی ئاراز هاشم، بەڕێوەبەری نەوت و کانزاکانی زاخۆ، بەبێ پشکنین ناهێڵرێت هیچ بەنزینێکی خراپ داخلی زاخۆ بکرێت، بۆیەش کەمترین سەرپێچی تۆمارکراوە. هاوکات لە سلێمانیش لەم مانگەدا حەوت بەنزینخانە لەسەر پێشێلکردنی ڕێنماییەکان سزا دراون.