وەزیری سەرچاوە ئاوییەکانی عێراق: عێراق دەگاتە هێڵی هەژاریی ئاو

ئاڤا نیوز

 

وەزیری سەرچاوە ئاوییەکانی عێراق هۆشداری لە مەترسی کەمبوونەوەی ئاوی ژێر زەوی دەدات و دەڵێت، عێراق لە ساڵی 2035 دا دەگاتە هێڵی هەژاریی ئاو.

 

وێنە گەورەکە: گۆڕانی کەشوهەوا کاریگەری لەسەر کەمبوونی ئاوی سەر زەوی و ژێر زەوی دروستکردووە، ئەمەش وەک مەترسییەکی جیهانی دەبینرێت، عێراقیش لەم مەترسییە بەدەر نییە.

 

لێدوانی فەرمی: عەون دیاب، وەزیری سەرچاوە ئاوییەکانی عێراق ڕایگەیاند: 70%ـی داهاتی ئاوی عێراق لە تورکیا و ئـێرانەوە دێت، درووستکردنی بەنداویش لەو دوو وڵاتە کاریگەری نەرێنی لەسەر عێراق درووست دەکات.

 

-ئێران چەندین بەنداوی لەسەر ڕووباری کارون دروستکردووە، تورکیاش تاڕادەیەک پابەندە بە ڕێککەوتنەکانی نێوان بەغدا و ئەنقەرە، بەڵام بەنداوێکی لەسەر ڕووباری دیجلە دروستکردووە، کە بڕیارە ساڵی داهاتوو دەست بە کارەکانی بکات، ئەمەش ئەو بڕە ئاوەی کە دەگاتە عێراق بەشێوەیەکی بەرچاو کەم دەکاتەوە. 

 

-پێشتر پشکی هەر تاکێکی عێراقی لە ئاوی سروشتی ساڵانە دەگەیشتە 1500 مەتر سێجا، ئێستا بۆ 800 مەتر سێجا کەمبووەتەوە و پێشبینی دەکرێت  تا ساڵی 2035 بگاتە 500 مەتر سێجا، لەو کاتەشدا عێراق دەگاتە هێڵی هەژاریی ئاو.