ئەحمەد شەرع وەک سەرۆکی قۆناغی ڕاگوزەر لە سووریا دەستنیشانکرا

ئاڤا نیوز

سەرۆکی دەسەڵاتی ئیدارەی نوێی سووریا وەک سەرۆکی کۆماری عەرەبی سووریا بۆ قۆناغی ڕاگوزەر دەستنیشانکرا و دەسەڵاتی پێکهێنانی ئەنجوومەنی کاتیی یاسادانانی بۆ قۆناغی ڕاگوزەر پێدرا تا ئەو کاتەی دەستوورێکی هەمیشەیی بۆ وڵات پەسەند دەکرێت و دەچێتە بواری جێبەجێکردنەوە.

 

لێدوانی فەرمی: عەقید حەسەن عەبدولغەنی، وتەبێژی ئۆپەراسیۆنە سەربازییەکانی سووریا ڕایگەیاند: وەرگرتنی پۆستی سەرۆکایەتی وڵات لەلایەن ئەحمەد شەرع بۆ قۆناغی ڕاگوزەر لە سووریا ڕادەگەیێنین.هاوکات ئەرکەکانی سەرۆکایەتی کۆماری عەرەبی سووریا جێبەجێ دەکات و نوێنەرایەتی سووریا لە کۆڕ و کۆڕبەندە نێودەوڵەتییەکان دەکات.

 

لەلایەکی دیکە: عەقید حەسەن عەبدولغەنی، هەڵوەشاندنەوەی هەموو دەزگا ئەمنییەکانی سەر بە ڕژێمی پێشوو، بە لق و ناوە جۆراوجۆرەکانیان و هەموو ئەو میلیشیایانە ڕاگەیاند کە دایمەزراندبوون. لە هەمان کاتدا دامەزراوەیەکی نوێی ئەمنی کە ئاسایشی هاووڵاتیان بپارێزێت دادەمەزرێنین.

- هەڵوەشاندنەوەی حیزبی بەعسی عەرەبی ئیشتراکی و حزبەکانی بەرەی پێشکەوتنخوازی نیشتمانی و سەرجەم ئەو ڕێکخراو و دامودەزگا و لیژنانە ڕادەگەیێنین و بە هیچ جۆرێک ڕێگە بە دروستکردنەوەیان لەژێر هەر ناوێکی دیکە نادرێت و دەبێت سەروەت و سامانەکانیان بگەڕێتەوە بۆ دەوڵەتی سووریا.
- هەموو گرووپە سەربازییەکان و ئۆرگانە شۆڕشگێڕی سیاسی و مەدەنییەکان هەڵدەوەشێنرێنەوە و دەخرێنە ناو دامەزراوەکانی دەوڵەتەوە.
- دەسەڵات بە سەرۆککۆمار دەدرێت بۆ پێکهێنانی ئەنجوومەنی کاتیی یاسادانان بۆ قۆناغی ڕاگوزەر تا ئەو کاتەی دەستوورێکی هەمیشەیی بۆ وڵات پەسەند دەکرێت و دەچێتە بواری جێبەجێکردنەوە.