قۆناغی سێیەمی وردبینی لە فۆڕمی دابەشکردنی زەوی تەواو دەکرێت

ئاڤا نیوز

 

وەزارەتی شارەوانی بەردەوامە لە وردبینیکردن بۆ فۆرمی دابەشکردنی زەوی فەرمانبەر و هێزە ئەمنییەکان، بەم زووانە قۆناغی سێیەمی ناوەکان ئاڕاستەی ئەنجوومەنی وەزیران دەکرێت.

 

چیرۆکی سەرەکی: پێشبینی دەکرێت لەم هەفتەیە فۆڕمی زیاتر لە 180 هەزار فەرمانبەر بۆ وەرگرتنی زەوی لەلایەن ئەنجوومەنی وەزیرانەوە پەسەند بکرێت و وەزارەتی شارەوانیش سەرقاڵی پێداچوونەوە و وربینیکردنە لە فۆڕمەکانی قۆناغی سێیەمی دابەشکردنی زەوی.

 

لێدوانی فەرمی: سه‌ربه‌ست مه‌ولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤا میدیای ڕاگەیاند: دەست بە وردبینیکردن بۆ وەزارەتەکانی ئەوقاف، تەندروستی، کشتوکاڵ، خانەنشینان کراوە، بەشێکی زۆری فۆرمەکانیان تەواو بووە، لە ئایندەیەکی نزیکدا تەواو دەکرێن و وەک قۆناغی سێیەم ئاراستەی ئەنجوومەنی وەزیران دەکرێن.

ژمارەکان وا دەڵێن: پێشتر ئاڤا میدیا ئاشکرایکرد کە دیارترین ئەو وەزارەتانەی وردبینی لە فۆرمەکانیاندا کراوە ئەمانەن: 

 

- وەزارەتی پەروەردە 94 هەزار فۆرم.
-وەزارەتی ناوخۆ 65 هەزار فۆرم.
- وەزارەتی خوێندنی باڵا 18 هەزار فۆرم.
- وەزارەتی پێشمەرگە 13 هەزار فۆرم.

باکگراوند: بە بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەراندا دەستیپێکرد، نزیکەی 300 هەزار کەس زەویان پێ دەدرێت، لە قۆناغی یەکەمدا زیاتر لە 15 هەزار کەس لە هەرێمی کوردستان زەوییان وەرگرت.