دروستکردنی چوار بەنداو لە هەرێمی کوردستان دەخرێتە نێو ستراتیژیەتی چارەسەری قەیرانی ئاو

ئاڤا نیوز

بابەتی دروستکردنی چوار بەنداو لە هەرێمی کوردستان لە نێو ستراتیژیەتی چارەسەری قەیرانی ئاوی عێراق جێگیرکراوە، بەڵام بەهۆی سستی هەنگاوەکانی وەزارەتی سەرچاوەکانی ئاوی عێراق تاوەکو ئێستا نەچوونەتە بواری جێبەجێکردن.

وێنە گەورەکە: دروستکردنی ئەو بەنداوانە نزیکەی پێنج ملیار مەتر سێجا ئاو گل دەداتەوە و ئاسایشی ئاو بۆ هەرێمی کوردستان و عێراق دابین دەکات، چارەسەری قەیرانی ئاوی بەشێکی ناوچەکان دەکات دەبێتە هۆی بووژانەوەی زیاتری کەرتی کشتوکاڵی و سامانی ئاژەڵ.

لێدوانی فەرمی: ڕەحمان خانی، بەڕێوەبەری گشتیی بەنداوەکانی هەرێمی کوردستان، بە ئاڤای گوت، "لە عێراق شوێن و زەمینەی لەبار نییە بۆ دروستکردنی بەنداوی گەورە، بۆیە لە هەموو کۆبوونەوە و هەنگاوەکانیاندا دروستکردنی ئەو چوار بەنداوە لە هەرێمی کوردستان وەک چارەسەرێک بۆ قەیرانی ئاوی بەشێکی ناوچەکان سەیر دەکرێت، ماوەتەوە سەر ئەوەی بودجە بۆ دروستکردنیان تەرخان بکرێت."

ئەوەی پێویستە بیزانیت: بەنداوەکان بریتین لە (مەنداوە لە هەولێر، تەقتەق لە کۆیە، باکرمان لە ئاکرێ و دەڵگە لە قەڵادزێ)، تێچووی دروستکردنیان چوار تریلیۆن دینارە.