فوئاد حوسێن: بە ئێرانمان وت پرسی گرووپە چەکدارەکان ناوخۆییە

ئاڤا نیوز

د.فوئاد حوسێن، وەزیری دەرەوەی عێراق  دەڵێت، بۆ ئێران دووپاتمان کردەوە پرسی گرووپە چەکدارەکانی عێراق پرسێکی ناوخۆیی عێراقە و نزیکن لە ڕێککەوتن لەسەر میکانیزمێک بۆ داخستنیان.

لێدوانی فەرمی: فوئاد حوسێن لە چاوپێکەوتنێکدا لەگەڵ ڕۆژنامەی "شەرق ئەلئەوسەت" گوتوویەتی:

- "لە سەردانەکەمان بە یاوەریی محەممەد شیاع سوودانی بۆ تاران، دووپاتمان کردەوە کە پرسی گرووپە چەکدارەکان پرسێکی ناوخۆیی عێراقە و دەبێت لەناوخۆی عێراق چارەسەر بکرێت".

- گفتوگۆ لەنێو کۆمەڵگە، ناوەندی سیاسی و سەرکردەکان لەئارادیە دەربارەی کۆکردنەوەی چەک لەدەستی دەوڵەت و چەندین میکانیزم لەمبارەیەوە خراونەتە ڕوو، لەوانەش، گرووپە چەکدارەکان ببنە بەشێک لە دەستەی حەشدی شەعبی کە دەستەکە یاساییە، یاخود ئەو گرووپانە چەکی خۆیان ڕادەستی حەشدی شەعبی بکەن و تەنیا ببنە هێزی سیاسی.

ئەوەی پێویستە بیزانیت: لە کۆتاییەکانی ساڵی ڕابردوودا ئەمریکا و ڵاتانی ڕۆژئاوا هۆشدارییان دابووە عێراق بۆ هەڵوەشاندنەوەی ئەو گرووپە چەکدارانەی سەر بە ئێران، لەو کاتەوەش حکومەتی عێراق لە گفتوگۆدایە لەگەڵ سەرکردەکانی ئەو گرووپانە لە پێناو چەک داماڵین و هەڵوەشاندنەوەیان.