ئەو چین و توێژانەی لە زەڕایەن زەوییان وەرنەگرتووە لە شارەزوور پێیان دەدرێت

ئاڤا نیوز

ئاڤا میدیا بەدواداچوون بۆ کێشەی ئەو چین و توێژانە دەکات کە لە زەڕایەن زەوییان وەرنەگرتووە و بڕیارە لە شارەزوور پێیان بدرێت، بەڵام لە شارەزووریش گرفتیان بۆ دروست بووە.

وێنە گەورەکە: ئەمڕۆ نوێنەری مامۆستایان، فەرمانبەران، چین و توێژە جیاوازەکانی شارەزوور گردبوونەوەتەوە و دەڵێن سەرۆکایەتیی شارەوانیی شارەزوور لە دابەشکردنی زەوی بەسەر فەرمانبەراندا نادادی دەکات و بەرژەوەندی کۆمپانیاکانی وەبەرهێنان لەپێش بەرژەوەندی 4 هەزار مووچەخۆری سنوورەکە دادەنێت.

ئەوەی لەوبارەیەوە دەگوترێت: بەگوتەی ئەو چین و توێژانە:

- شارەوانی شارەزوور زەوییە نایاب و بە سوودەکان کە زیاتر لە 170 دۆنمە بۆ سێ کۆمپانیای وەبەرهێنانی داناوە کە ئێستا 50 دۆنمی لەلایەن کۆمپانیای "دۆڵی مەلەکان"ەوە سیاج کراوە، لە کاتێکدا زەوی دوورەدەست و کەمبەها بۆ فەرمانبەران دەستنیشان کراوە.

- تەنانەت باس لەوەش دەکەن کە سێ سەعات لەگەڵ سەرۆکی شارەوانی شارەزوور کۆبوونەتەوە و پێداگری کردووە  لەسەر پێدانی زەوی بەو کۆمپانیایانە، دەشڵێن شارەوانی بڕیارێکی کۆنی ئەنجوومەنی شارەوانییەکانی شارەزووری (6ی 8ی 2024) خستووەتە بەردەستییان، بڕیارە نوێیەکەی شاردووەتەوە کە تێیدا بە زۆرینەی دەنگ بڕیار دراوە زەوییەکان بدرێت بە کەسوکاری شەهیدان و کەمئەندامی سەنگەر و پێشمەرگە و هێزەکانی ناوخۆ و فەرمانبەران.